Երեկ Նիկոլ Փաշինյանը հայտարարեց, թե ՀԱՊԿ զորավարժություններ այս տարի Հայաստանում չեն կայանա։ ԱԺ «Հայաստան» խմբակցության ղեկավար Սեյրան Օհանյանն այսօր լրագրողների հետ զրույցում նշեց, որ նման որոշումը պահանջ է եղել։
«Դուք չե՞ք տեսնում, որ պարտված իշխանությունները ճնշումների թելադրանքի ներքո են»,- ասաց նա և հավելեց, որ թշնամու սադրանքներին այս իշխանությունը պարզապես կուլ է գնում։
Հարցին՝ այդ զորավարժությունները մեզ օգուտ տալո՞ւ էին, վերջինս պատասխանեց՝ իհարկե։ «Բանակի բարեփոխումներ դեռևս չկան, բայց սեփական երկրում հրաժարվել զորավարժություններից՝ նշանակում է թույլ աշակերտին չփորձել սովորեցնել գիտելիքները բարձրացնել։ Հրաժարվել միջազգային զորավարժություններից՝ նշանակում է հրաժարվել նաև այդ ուղղությամբ միջազգային փորձի փոխանակումից»,-ասաց նա։
Դիտարկմանը, թե ընդդիմությունն ասում է՝ իշխանությունն այս տարիներին որևէ քայլ չի արել բանակը հզորացնելու ուղղությամբ, ավելին՝ հակառակն է տեղի ունեցել, սակայն նույն ժամանակ Նիկոլ Փաշինյանն էլ ասում է՝ կարծել ենք, թե նախկինում հզոր բանակ ենք ունեցել, Օհանյանը պատասխանեց․
«Երկար կարող եմ խոսել, քանի որ մի քանի բառով չենք կարող դա բացատրել։ Բայց մենք ունեցել ենք բանակ, որը տարածաշրջանում հաղթանակած բանակ է եղել, կատարելագործվել է, մրցունակ է եղել, որը ցույց է տվել։ Չեմ ասում, որ բանակը եղել է իդեալական, սպառազինված է եղել մինչև ատամները, բայց այն, ինչ ունեցել ենք, բավարար է եղել, որ մեր առաջ պաշտպանական խնդիրները լուծենք»,-ասաց նա և հավելեց, որ բանակի նկատմամբ հարվածները եղել են 2018 թվականից հետո։
Օհանյանի խոսքով՝ բանակի քաղաքականությունն իջեցվել է կենցաղային մակարդակի։ «Կլուբնիկայի, տռուսիկ-մայկայի, և այս ուղղությամբ երեք անգամ ավելի ահռելի գումար են օգտագործել, որը կարելի էր օգտագործել սպառազինության համար։ Թո՛ղ ձենները կտրեն, բանակը իրենք են ոտնահարել»,-շեշտեց նա։
Մանրամասները՝ տեսանյութում