Գլխավոր դատախազությունը բողոքարկել է երրորդ նախագահ Սերժ Սարգսյանի արդարացման որոշումը։ 

Սերժ Սարգսյանի արդարացման որոշումը բողոքարկվել է հակակոռուպցիոն վերաքննիչ դատարան, հայտնել է կառույցը։

Երրորդ նախագահին առընչվող գործը վերաբերում է վառելիքի մատակարարման գործընթացում ենթադրյալ չարաշահումներին, որը հայտնի է «Դիզվառելիքի գործ»: Հենց այսօր գործով դատարանն արդարացման վճիռ էր ընդունել։

Դատավոր Վահե Միսակյանի վճռով արդարացվել էին նաև «Ֆլեշ» ընկերության սեփականատեր Բարսեղ Բեգլարյանը և գյուղնախարարության նախկին պաշտոնյա Գևորգ Հարությունյանը։ Վերջին երկուսի նկատմամբ խափանման միջոց էր ընտրվված ստորագրությունը երկրից չբացակայելու մասին։ Դատարանը վերացրել էր նաև խափանման միջոցը։

Սերժ Սարգսյանին մեղադրանք էր առաջադրվել ՀՀ ՔՕ 38-179-րդ հոդվածի 3-րդ մասի 1-ին կետով՝ առանձնապես խոշոր չափերով յուրացում կամ վատնում։ Ըստ մեղադրանքի` Սերժ Սարգսյանի կազմակերպմամբ և «Ֆլեշ» ընկերության սեփականատեր Բարսեղ Բեգլարյանի դրդմամբ, ՀՀ գյուղատնտեսության նախկին նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15 391 765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489 160 310 դրամ:

Արդարացման վճիռը կայացվել էր դեռ մայիսի 31-ին։