Կատարված ուսումնասիրությունները չեն հայտնաբերել կանեփի տեսակներ Haribo մարմելադային կոնֆետների խմբաքանակներում, որոնցից նախկինում թունավորվել են Ալմելո քաղաքի երեխաներ, հայտնել է Նիդեռլանդների ոստիկանությունը։
Թագավորության դատաբժշկական ինստիտուտի փորձագետները վերլուծել են ինչպես արտադրական գծից կոնֆետների նմուշները, այնպես էլ խանութներից առգրավված խմբաքանակները։ «Զննված նմուշներում կանեփի առկայություն վկայող նյութ չի հայտնաբերվել»,- նշված է իրավապահների հաղորդագրությունում։
Փորձաքննության արդյունքները տարբերվում են ոստիկանության կողմից նախկինում անցկացված նախնական թեստերի արդյունքներից, որտեղ դեռևս առաջացել է քաղցրավենիքի մեջ թմրանյութի առկայության կասկած։
Հետազոտության արդյունքների հիման վրա ոստիկանությունը եկել է այն եզրակացության, որ կանեփը չէր կարող ներթափանցել Haribo արտադրանքի մեջ ոչ արտադրության փուլում, ոչ էլ հետագա լոգիստիկայի ընթացքում: Քաղցրավենիք օգտագործած երեխաների առողջական վիճակի վատթարացման պատճառների հետաքննությունը շարունակվում է։ Այն վարում է Նիդեռլանդների դատախազությունը։
Մայիսի 29-ին Նիդեռլանդների սննդամթերքի և սպառողական ապրանքների անվտանգության վարչությունը հայտնել էր, որ կանեփ է հայտնաբերվել Haribo կոնֆետներում, որոնք հետ են կանչվել վաճառքից։ Ալմելոյում երկու երեխա իրենց վատ էին զգացել և կոնֆետներն ուտելուց հետո հոսպիտալացվել էին։ Ավելի ուշ հաղորդվել էր, որ նրանցից մեկը կարճ ժամանակով կոմայի մեջ է ընկել։ Բացի այդ, Haribo կոնֆետների խմբաքանակը հետ է կանչվել Բելգիայում նույն պատճառով՝ խոսքը վերաբերում է 2026 թվականի հունվարի պիտանելիության ժամկետով «Happy Cola F!ZZ» փաթեթներին։