«Ժողովուրդ» օրաթերթը գրում է.
«Վերաքննիչ դատարանում Փաշինյանի ուղղությամբ խնձոր նետած պապիկի գործով ուշագրավ իրավիճակ է սպասվում։ Բանն այն է, որ գործը մակագրվել է ՀՀ վերաքննիչ քրեական դատարանի դատավորներ Վաչե Մարգարյանին, Նարինե Հովակիմյանին, Էդգար Մանասյանին։ Դատելով, թե ով է գործը նախագահող դատավորը՝ բավականին թեժ է լինելու։
Բանն այն է, որ Վաչե Մարգարյանը, որին մակագրվել է Դատախազության բողոքը պապիկի դեմ, հանրության ուշադրության կենտրոնում հայտնվել է տարիներ առաջ՝ Հայաստանի երկրորդ նախագահ Ռոբերտ Քոչարյանին առաջին անգամ կալանավորելու որոշմամբ։ Այս որոշումից ամիսներ անց հրապարակվել էր 2018 թվականին ԱԱԾ պետ Արթուր Վանեցյանի եւ ՀՔԾ պետ Սասուն Խաչատրյանի հեռախոսային խոսակցության ձայնագրությունը, որում շրջանառվում էր նաեւ Վաչե Մարգարյանի անունը։ Ավելին՝ փաստաբան Երեմ Սարգսյանը Միքայել սրբազանի գործը Մարգարյանին մակագրելու վերաբերյալ հայտնել էր. «Եթե իշխանությունները ցանկանում են անվրեպ իրականացնել կալանքի հաստատումը, բողոքի մերժումը, ուրեմն կոնկրետ դատավորների են գործը մակագրում։ Իմ փորձը, իմ դիտարկումները վկայում են այն մասին, որ վերաքննիչ դատարանում Արմեն Դանիելյանից հետո Վաչե Մարգարյանին են մակագրում նման գործերը»։ Կարճ ասած՝ ՔՊ-ի «սրտի» քմահաճույքները կատարող դատավորի ձեռքում է արցախցի տարեց պապիկի ճակատագիրը։
Սակայն գործով մեկ այլ դատավոր՝ Նարինե Հովակիմյանը, դատական համակարգում համարվում է «կռիվ տվող դատավոր», ու չի բացառվում՝ Մարգարյանի որոշումներին դեմ գնա։ Հիշեցնենք, որ Երևանի ընդհանուր իրավասության քրեական դատարանը դատավոր Արման Հովհաննիսյանի նախագահությամբ արդարացման վճիռ է կայացրել՝ Նիկոլ Փաշինյանի ուղղությամբ խնձոր նետելու համար մեղադրվող տարեց Ալբերտ Առստամյանի նկատմամբ։ Համաձայն դատարանի՝ Ալբերտ Առստամյանի մեղադրանքն ապացուցված չէ։ Արցախցի պապիկը մեղադրվում էր 2024թ․ օգոստոսի 23-ին Քանաքեռ-Զեյթուն վարչական շրջանի Ռուբինյանց 2 հասցեի շենքերից մեկի 9-րդ հարկի պատշգամբից Նիկոլ Փաշինյանի ուղղությամբ խնձոր նետելու համար։ Ալբերտ Առստամյանը իրեն մեղավոր չէր համարում՝ իր արարքը ներկայացնելով որպես քաղաքական դժգոհության արտահայտում։ Առաջին ատյանի այս որոշումը Գլխավոր դատախազությունը բողոքարկել էր ՀՀ վերաքննիչ դատարան»։ Մանրամասները՝ «Ժողովուրդ» օրաթերթի այսօրվա համարում:
«Ժողովուրդ» օրաթերթը գրում է.
«ՔՊ-ական Արուսյակ Ջուլհակյանը երեկ նեղսրտել էր իր մասին գրված մի հոդվածի առիթով։ «Ժողովուրդ» օրաթերթը հրապարակել էր հոդված, որում ներառել էինք նրա՝ ՔՊ վարչության անդամ դառնալու պայքարի մասին՝ զուգահեռ գրելով նրա կենսագրության և հայտարարագրի վերաբերյալ։ Տեխնիկական փոքրիկ վրիպակը Արուսյակ Ջուլհակյանն օգտագործեց որպես առիթ՝ վիրավորանքի և իր մաղձը թափելու համար։ Սակայն, եկեք խոսենք փաստերով։ Ջուլհակյանը գրել էր. «…Ես իհարկե հասկանում եմ, որ ամենալուրջ «կեղտը», որ կարողացել եք գտնել ինձ վրա, հիփոթեքով բնակարանն է, որը նույնիսկ դեռ չեն հանձնել ինձ շահագործման, բայց դա մի կողմ․․․»։
Բնակարան գնելը «կեղտ բռնել» համարող պատգամավորին ամեն դեպքում կարող ենք ասել, որ բնակարան գնելը մեղք չէ։ Իսկ որ բնակարան եք գնել միայն պատգամավոր դառնալուց հետո և գործուղումների ու պարգևավճարների շնորհիվ հարստանալու հաշվին եք այն ձեռք բերել, իբրև փաստ անհերքելի է։ «Ես չունեմ վարկեր և փոխառություններ տարբեր բանկերից: Բանկերից այլ բան ունեմ, բայց, թե այ ինչ, կիմանաք, երբ հայտարարագիր կարդալ սովորեք», – գրել էր Ջուլհակյանը։ Իբրև վարկ-փոխառություն՝ պատգամավորը «Ինեկոբանկ» ՓԲԸ-ից ստացել է 2 մլն 826 հազար դրամ վարկ։
Հավելում կատարելով նախորդ նյութին՝ նշենք, որ իբրև տրված փոխառությունների կամ բանկային ավանդների դիմաց ստացված տոկոս և այլ հատուցում Արուսյակ Ջուլհակյանը ստացել է գրեթե 2,3 մլն դրամ և 525 դոլար գումար։ Ահա այսպես հեղափոխությունից հետո ՔՊ-ական շատ պատգամավորներ ոչ միայն կայուն աշխատանք ունեն, այլև տներ ու մեքենաներ են ձեռք բերում, ամառանոց ու ավտոտնակ՝ հընթացս վիրավորելով լրագրողներին: Խաղաղվե՛ք, տիկնա՛յք և պարոնա՛յք, դուք վաղուց մերժված «նախկիններից» ավելի եղկելի եք, ավելի կոռումպացված ու ավելի երեսպաշտ: Սա արդեն կայուն կարծիք է ՀՀ-ում դարձել»։ Մանրամասները՝ «Ժողովուրդ» օրաթերթի այսօրվա համարում: