Թուրքիայում անասնաբույժը փրկել է սողանքի տակ մնացած շան ու նրա ձագերի կյանքը,- հայտնում է Daily Mail-ը։
Սոներ Բույումեզն աշխատում էր Թուրքիայի հեռավոր շրջաններից մեկում գտնվող ֆերմայում` այնտեղ սողանքից անմիջապես հետո շան նվնվոց է լսել և հասկացել,որ կենդանին օգնություն է կանչում: Անասնաբույժը վազել է սողանքի վայր և արագ հայտնաբերել շանը, որը մինչև պարանոցը բարձրացել էր ցեխով լցված փոսի մեջ և չի կարողացել շարժվել։ Միայն կենդանու գլուխն էր ցցված մակերեսից վեր։Անասնաբույժը փոքրիկ բահով փորել է հողը։ Նրան հաջողվել է հանել շանը և փրկել դանդաղ ու ցավալի մահից։ Բայց շունը շարունակել է նվնվալ, թեև չէր վիրավորվել։ Բույումեզը հասկացել է, որ այլ կենդանիներ ևս մնացել են հողի տակ։
Անասնաբույժն ու նրա գործընկերը ծնկի են իջել և շարունակել հող ու քարեր փորել։ Մի քանի րոպե անց նրանք գտել են շան ձագին, որը ցեխի մեջ կորած էր: Վախենալով, որ ձագը կարող է սատկած լինել, Բույումեզը արագ սկսել է հողը փորել՝ նրան ազատելու համար։ Պարզվել է, որ կենդանին անվնաս է։
Տղամարդիկ շարունակել են փորել երկու ժամ և կարողացել են փրկել ութ ձագի։
Բույեմեզը որոշել է որդեգրել շանը և նրա ձագերին։ «Նրանց ընդհանուր վիճակը շատ լավ է։ Մայրն ու ձագերը ապահով են։ Ես նրանց այնպես կպահեմ, կարծես դրանք իմն են»,- ասել է նա։