«Ժողովուրդ» օրաթերթը գրում է․
«Մի շարք խոշոր ձեռնարկություններում՝ ԶՊՄԿ-ում, «Լիդիան Արմենիայում» և այլ հաստատություններում մասնաբաժիններ ստանալուց հետո Նիկոլ Փաշինյանի ՔՊ-ականներն այս անգամ ընկել են «Հայէլցանցերի» հետևից։
Սեպտեմբերի 20-ին Ազգային Ժողովում «Քաղաքացիական պայմանագիր» խմբակցությունը քննարկում էր ծավալել էլեկտրաէներգիայի խափանումների, անջատումների հետ կապված հարցերի վերաբերյալ։
Քննարկմանը, որը վարել են խմբակցության ղեկավար Հայկ Կոնջորյանը եւ խմբակցության քարտուղար Արթուր Հովհաննիսյանը, հրավիրված էին ՀՀ տարածքային կառավարման եւ ենթակառուցվածքների նախարար Գնել Սանոսյանն ու հանրային ծառայությունները կարգավորող հանձնաժողովի նախագահ Գարեգին Բաղրամյանը: Ըստ ՔՊ-ական Հայկ Կոնջորյանի՝ բոլոր կառույցները՝ ԱԺ-ն, կառավարությունը, ՏԿԵՆ-ը, հանրային ծառայությունները կարգավորող հանձնաժողովը, իրենց տեղերում են և տողատակերում անպատասխան մի հարց է թողել՝ «իսկ ո՞վ է մեղավոր»։ Քննարկումը, ըստ ԱԺ կայքի, ի բարօրություն ոլորտի բարելավման էր, սակայն թատերաբեմ դարձած ԱԺ-ում իշխանականների նպատակը այլ էր։
«Ժողովուրդ» օրաթերթի տեղեկությունների համաձայն՝ իշխող խմբակցությունը նպատակ ունի ՀԷՑ ցանցը փաստացի խլել ռուսաստանաբնակ գործարար Սամվել Կարապետյանի ձեռքից, ինչպես Զանգեզուրի պղնձամոլիբդենային կոմբինատի սեփականատերերը վաճառեցին, ապա ստիպված եղան 15% բաժնեմասը նվիրել կառավարությանը։
Մեր ունեցած տեղեկության ապացույցը նույն ՔՊ հրավիրած քննարկման ընթացքում տվեց ՔՊ-ական Անդրանիկ Քոչարյանը՝ հարց հնչեցնելով. «Մենք տիրապետո՞ւմ ենք այն տեղեկատվությանը, թե սեփականատերը ինչ գնով է ձեռք բերել «Տաշիր» ցանցը։ Պատասխանը մինչ այժմ ոչ ոք չգիտի։ Դրա ապացույցը ինձ համար եղել է այն, որ ձեռքբերումից հետո ամենապահանջված պաշտոնները, որին ձգտում էին բոլորը, ՀԷՑ-ի համակարգի պաշտոն զբաղեցնելն էր. տարածքային պետերը, մասերի պետերը, ըստ աստիճանակարգի, շատ արագ դարձան միլիոնատերեր։ Գաղտնիք չէ, չէ՞»,- ասել է Անդրանիկ Քոչարյանը։
Այս հարցը նա ուղղել է Հանրային ծառայությունները կարգավորող հանձնաժողովի նախագահ Գարեգին Բաղրամյանին՝ բողոքելով 14-15 ժամով Կենտրոնում հոսանքազրկումներից։
Հարկ է նշել, որ, այո, ՀԷՑ-ի աշխատանքից դժգոհություններ կան, հոսանքազրկումները խայտառակ ծավալի են հասել, բայց դեռ դրանք այն ողբերգական մակարդակում չեն, ինչպես օրինակ «Վեոլիա Ջուր» ընկերության դեպքում, երբ 50%-ից ավելի ջրի կորուստ ունենք, մայրաքաղաքն էլ Վենետիկի է «վերածվում» գրեթե ամեն անձրևից հետո, բայց ՔՊ-ից ոչ ոք ջրամատակարարման և ջրահեռացման համակարգի կոլապսի մասին չի անհանգստանում, ԱԺ-ում քննարկում չի կազմակերպում: Ֆրանսիական «Վեոլիա Ջրի» դեմ ոչ մի քայլ չի ձեռնարկվում»:
«Հրապարակը» գրում է․
Անցած շաբաթվա վերջին իրավապահներն առգրավել են Կապանի համայնքապետարանի՝ սուբվենցիաներին վերաբերող ֆինանսական փաստաթղթերը, կապարակնքել «Նորոգշին» ընկերությունը, առգրավել ՍՊԸ-ի փաստաթղթերը։ ՍՊԸ-ն պատկանում է համայնքապետ Գեւորգ Փարսյանի հորը, որը սուբվենցիաների մեծ մասն է իրականացնում։ Փարսյանն իրավապահների ուշադրության տակ է հայտնվել այն պահից ի վեր, երբ ամիսներ առաջ, Բագրատ սրբազանի՝ Սյունիք այցի ժամանակ, ի տարբերություն մյուս համայնքապետերի, ջերմ ընդունելության արժանացրեց նրան։ Փաստորեն, ամիսներ շարունակ աշխատել են նրա ուղղությամբ։ Երեկ ողջ օրվա ընթացքում Փարսյանը եւ համայնքապետարանից որեւէ մեկը չպատասխանեց մեր հարցերին:
«Փաստ» օրաթերթը գրում է.
Երբ որոշ ժամանակ առաջ հայտնի դարձավ, որ ՔՊ-ի կենտրոնական գրասենյակը Սայաթ-Նովա և Չարենց փողոցների խամերուկից կարող է տեղափոխվել այլ վայր, տեղի բնակիչներն ու ՔՊ-ի գրասենյակին մերձ տարածքների տարբեր կազմակերպությունների աշխատակիցները բավականին ոգևորվել էին՝ «վերջապես գլուխներս կհանգստանա»:
Բանն այն է, որ ամեն անգամ, երբ Նիկոլ Փաշինյանն այցելում է գրասենյակ, իսկ դա հատկապես վերջին շրջանում շատ հաճախ է լինում, գրասենյակի մերձակա հատվածը վերածվում է «արտակարգ ռեժիմի գոտու»: Նախ՝ երթևեկությունն է կաթվածահար լինում, ապա տարածքը շրջապատում են անվտանգության բազմաթիվ աշխատակիցները, որոնք «աչքները չորս արած» հետևում են ամբողջ անցուդարձին: Մոտակայքի «կարմիր» գծերում այդ ընթացքում կայանելու մասին խոսք չկա, մյուս կողմից՝ մարդիկ դժգոհում են, որ բավական է Նիկոլ Փաշինյանի՝ գրասենյակում գտնվելու ժամանակահատվածում երկու անգամ այդ հատվածով անցնես, միանգամից հայտնվում ես Փաշինյանի թիկնազորի ուշադրության կենտրոնում՝ ընդ որում, հաճախ զավեշտի հասնող հարցերով՝ «այս ի՞նչ ես գնում-գալիս», «ի՞նչ ես անում ստեղ», «ինչի՞ հենց այս մայթով» և այլն:
Մեր տեղեկություններով, ՔՊ գրասենյակի ազատվելու հետ կապված տեղի բնակիչների ու կազմակերպությունների աշխատակիցների ուրախությունը երկար չի տևել: Նրանք տեղեկություններ ունեն, որ ՔՊ-ի տեղափոխությունը առայժմ հետաձգվում է: