«Հրապարակ» օրաթերթը գրում է.

Նիկոլ Փաշինյանի ձեռագիրը ստալինյան բռնաճնշումների ժամանակներն են հիշեցնում, երբ չէին խնայում ո՛չ մերձավոր զինակիցներին, ո՛չ կանանց ու երեխաներին։ Վերջին կոռուպցիոն «բացահայտումների» շոուի գլխավոր դերակատարները հիմնականում կանայք են՝ էկոնոմիկայի 32-ամյա փոխնախարարը, վարչության պետը, «Սիներջի» ընկերության 2 կին ներկայացուցիչ, որոնց նախնական կալանքի հարցում Փաշինյանի գրպանային իրավապահներն անգամ հաշվի չառան նրանց խնամքի տակ գտնվող մանկահասակ երեխաներին եւ մեղադրանքի բնույթը: Անգամ «բռնապետ» հռչակված Սերժ Սարգսյանի ժամանակ չգրված կանոն կար, որ տնտեսական հանցագործությունների համար կանանց նախնական կալանք չէին տալիս` նրանք ազատության մեջ էին մնում մինչեւ դատավճիռը։

Երեկ կանանց իրավունքների պայքարի առաջամարտիկ Զարուհի Բաթոյանին հարցրինք՝ խնդրահարույց չէ՞ կատարվածը։ «Ես շատ ընդհանրական պատասխան եմ տալու, բայց բոլոր իրավիճակներում կանայք եւ երեխաները շատ ավելի խոցելի են, քան տղամարդիկ, լինի կոռուպցիոն սկանդալ, թե բռնություն, քաղաքական կյանք, անկախ քաղաքական պատկանելությունից։ Ցավոք, դա եղել է միշտ եւ շարունակում է ինձ մտահոգել։ Ես կարծում եմ, որ, այո, մենք պետք է միշտ զգույշ լինենք, երբ գործ ունենք կանանց հետ, այո՝ անմեղության կանխավարկածի հետ, սա միշտ եմ ասել»։ Այսինքն՝ խնդրահարո՞ւյց եք համարում եւ կարծում եք, որ կանանց «փակում» են, քանի որ նրանցից հե՞շտ է ցուցմունքներ ստանալը։ «Հույս ունեմ, որ ոչ»: Իսկ դատապարտո՞ւմ եք, որ կանայք են թիրախավորվել։ «Ես դատապարտում եմ ցանկացած թիրախավորում, որը մարդու սեռով, հաշմանդամությամբ եւ քաղաքական պատկանելությամբ է պայմանավորված»։

«Ժողովուրդ» օրաթերթը գրում է․

«Ինչպես «Ժողովուրդ» օրաթերթի աղբյուրներն են փոխանցում, 2023թ.-ի մարտից քաղաքացիների աշխատավարձերից պահվող գումարները չեն փոխանցվել կենսաթոշակների կուտակային ֆոնդին, այլ ուղղվել են անհայտ ինչ-որ ծախսերի:

Արցախի մեր աղբյուրների փոխանցմամբ՝ կենսաթոշակային կուտակային ֆոնդի շահառու են հանդիսանում մոտ 35.000 ԱՀ քաղաքացի, որոնց իրավունքները փաստացի կոպտորեն խախտվել են:

Մեր տեղեկություններով՝ Արցախի պատգամավորները օրերս այս հարցով փակ քննարկում են արել ու կոնսենսուսի են եկել, որ պետք է քննիչ հանձնաժողով ստեղծել, որպեսզի պարզեն՝ ինչին են ուղղվել քաղաքացիների կուտակային գումարները, եւ ով է դրա պատասխանատուն»։

«Հրապարակ» օրաթերթը գրում է.

Իշխանությունում աջ ձեռքը չգիտի՞, թե ձախն ինչ է անում: Մինչ իշխանական շրջանակներից հայտարարություններ են անում Հայաստանի Հանրապետության պետական խորհրդանիշները փոխելու անհրաժեշտության մասին, իսկ օրերս էլ ԱԺ նախագահ Ալեն Սիմոնյանն էր օրհներգն ու զինանշանը փոխելու մասին կարծիք հայտնել, ԿԳՄՍՆ-ն նախօրեին շրջաբերական է ուղարկել դպրոցներին՝ հանձնարարելով, որ ամեն երկուշաբթի՝ մինչ դասերի սկսվելը, դպրոցում հնչի ՀՀ օրհներգը․ կա՛մ ձայնագրությամբ, կա՛մ էլ ակապելա կատարմամբ դպրոցի աշակերտները պետք է կատարեն:

Շրջաբերականում մանրամասն նկարագրել են նաեւ դրոշի տեղակայման վայրը եւ տեսքը, այն չպետք է լինի ճմրթված, պետք է ուղիղ տեղադրված լինի շքամուտքում, ունենա մաքուր, կոկիկ տեսք։

«Ժողովուրդ» օրաթերթը գրում է․

«Ժողովուրդ» օրաթերթի տեղեկությունների համաձայն՝ նախաքննական մարմինը, ըստ ամենայնի, հարցաքննության կհրավիրի ՀՀ էկոնոմիկայի նախարար Վահան Քերոբյանին, քանի որ նախաքննական մարմնում քննարկվել է հարց, որ նախարարի հաստատումով են կատարվել գնումների գործընթացները։

Հիշեցնենք, որ երեկ ArmLur.am-ը հայտնեց, որ Քննչական կոմիտեն Էկոնոմիկայի նախարարության չարաշահումների քրեական գործով 7 անձի մեղադրանք է առաջադրել, որոնց մեջ էին նաեւ պաշտոնից ազատված փոխնախարար Անի Իսպիրյանը եւ ԱԺ նախագահ Ալեն Սիմոնյանի եղբոր կինը՝ Անի Գեւորգյանը: Քրեական գործով անցնող 7 մեղադրյալները կալանավորված են։

Նշենք, որ ՀՀ ազգային անվտանգության ծառայության աշխատակիցների կողմից ձեռնարկված լայնածավալ օպերատիվ-հետախուզական միջոցառումների, ՀՀ քննչական կոմիտեի պետության, սահմանադրական կարգի հիմունքների եւ հասարակական անվտանգության դեմ ուղղված հանցագործությունների քննության գլխավոր վարչությունում իրականացվող քրեական վարույթի շրջանակներում կատարված քննչական եւ գաղտնի քննչական գործողությունների արդյունքում փաստական տվյալներ են ստացվել այն մասին, որ ՀՀ էկոնոմիկայի նախարարության պաշտոնատար անձինք նախնական համաձայնությամբ, մի խումբ անձանց դրդմամբ եւ օժանդակությամբ չարաշահել են ծառայողական լիազորությունները։
Այս խմորը դեռ երկար ջուր կտանի»։

«Հրապարակ» թերթը գրում է.

«Հրապարակը» երեկ կապվեց Լարսի անցակետում Հայաստանի Հանրապետության ներկայացուցիչ Վահան Հակոբյանի հետ, որպեսզի հետաքրքրվի՝ ինչ իրավիճակ է այս պահին տիրում Լարսում, ճանապարհներն անցանելի՞ են, կա՞ն բեռնատարների կուտակումներ։

«Այս պահին իրավիճակը հետեւյալն է․ ճանապարհն այս պահին բաց է, սակայն այս օրերին հիմնականում փակվում է, քանի որ երեկոյան ժամերին ճանապարհը սառցակալվում է, եւ բեռնատարների համար երթեւեկությունն այդ ոլորանների վրա վտանգավոր է դառնում, դրա համար Վրաստանի իշխանությունները հիմա ժամանակ առ ժամանակ բեռնատարների համար երթեւեկությունը սահմանափակում են։ Նաեւ շուտով, երեւի հաջորդ շաբաթվա ընթացքում էլի ձյան տեղումներ են սպասվում, կարծում եմ՝ ճանապարհն էլի կփակվի։ Սակայն այս պահին բաց է, եւ կուտակված մեքենաները փորձում են անցնել։ Այս պահին բավականին կուտակումներ ունենք՝ մոտ 600-700 բեռնատար ունենք, որոնք Հայաստանից դուրս են եկել, բայց Ռուսաստանում դեռ ձեւակերպում չեն ստացել, այսինքն՝ դրանց մի մասը դեռ Վրաստանի տարածքում է գտնվում, մի մասն արդեն Լարսի անցակետում ձեւակերպվում է։ Հակառակ ուղղությամբ էլի նույն քանակությամբ բեռնատարներ ունենք, որոնք սպասում են Հայաստան հասնելուն»,- պատասխանեց Հակոբյանը։

Հիմնականում ի՞նչ բեռներ են Հայաստանից դուրս եկած բեռնատարներում, Հակոբյանի խոսքով՝ տարբեր բեռներ կան՝ կոնյակ, միրգ, բանջարեղեն, շինանյութ եւ այլն։ Հակոբյանին խնդրեցինք ասել, թե արդյոք Հայաստան մտնելուն սպասող բեռների շարքում «Վայլդբերիսի» բեռնատարներ կա՞ն․ տարբեր քաղաքացիներ իրենց ֆեյսբուքյան էջերում ահազանգում են, որ իրենց պատվերները տեղ չեն հասնում։ «Այս պահին որեւէ տարբերություն չկա, թե ինչ բեռ է տեղափոխում բեռնատարը, բոլորը նույն առաջնահերթությամբ ձեւակերպվում են եւ շարունակում են ճանապարհը։ Համոզված եմ, որ հերթի մեջ նաեւ «Վայլդբերիսի» բեռնատարներ էլ կլինեն, որոնք իրենց հերթին նույնպես կձակերպվեն եւ կշարունակեն ճանապարհը։ Այս պահին «Վայլդբերիսի» հետ կապված որեւէ խնդրի մասով բողոք չենք ստացել»,- ասաց Հակոբյանը՝ կրկին հավելելով, որ բեռնատարների կուտակումները կապված են միայն եղանակային պայմանների հետ։