Տոկիոյի բուդդայական Ջոջոջի տաճարում սկսվել է Ճապոնիայի նախկին վարչապետ Սինձո Աբեի հրաժեշտի արարողությունը, որը մահացել է ուրբաթ օրը մահափորձի հետևանքով. հայտնում է «РИА Новости»-ի թղթակիցը։
Ճապոնիայում հրաժեշտի արարողությունը, ինչպես հուղարկավորությունը, շատ դեպքերում տեղի է ունենում բուդդայական ծեսի համաձայն։ Բուդդայական վանականը կամ տաճարի վանահայրը կարդում է սուտրաները: Հարազատների ու ընկերների համար սա հանգուցյալին հրաժեշտ տալու վերջին հնարավորությունն է։ Արարողության մասնակիցները հերթով մոտենում են դագաղին՝ հատուկ ամանի մեջ խունկ ծխելու համար, ցանկության դեպքում կարող են հրաժեշտի ելույթ ունենալ։ Արարողությունը սկսվում է երեկոյան և տևում է մի քանի ժամ։
Հիմնական մասի ավարտից հետո դահլիճում մնում են միայն ընտանիքը և բուդդայական վանականը, ովքեր պետք է ամբողջ գիշեր կարդան սուտրաները, աղոթեն և հետևեն, որ խունկը չմարի։
Հուղարկավորության և դիակիզման արարողությունը տեղի է ունենում հաջորդ օրը։
Սգո միջոցառումներին տան ղեկավարը կլինի Աբեի այրին՝ Ակին։ Ընտանիքի խնդրանքով Սինձո Աբեի հրաժեշտն ու հուղարկավորությունը տեղի կունենա հարազատների և ընկերների նեղ շրջապատում։ Հուղարկավորության օրը Յամագուչի պրեֆեկտուրայի Շիմոնոսեկիում Աբեի նախնիների ընտրատարածքում ու հայրենիքում կտեղադրվի ծաղկեպսակ դնելու զոհասեղան։ Ավելի ուշ Տոկիոյում և Շիմոնոսեկիում կկազմակերպվի հրաժեշտ բոլորի լայն շրջանակի համար, ովքեր ցանկանում են հարգանքի տուրք մատուցել նախկին վարչապետի հիշատակին, ամսաթիվը որոշված չէ։
