Էստոնիայի արտգործնախարար Մարգուս Ցահկնան պատժամիջոցներ է սահմանել՝ արգելելով վրացական իշխանությունների 11 ներկայացուցիչների, այդ թվում՝ Վրաստանի ներքին գործերի նախարար Վախթանգ Գոմելաուրիի և իշխող «Վրացական երազանք» կուսակցության պատվավոր նախագահ Բիձինա Իվանիշվիլիի մուտքը երկիր, հայտնել են ԶԼՄ-ները։
Ըստ Ցահկնայի՝ մուտքի արգելքը սահմանվել է այդ անձանց՝ Վրաստանում մարդու իրավունքների կոպիտ խախտումներին մասնակցելու և օրինական բողոքի ցույցերը բռնությամբ ճնշելու համար:
«Վրաց ժողովուրդն իրավունք ունի տեր կանգնել իր իրավունքներին, քանի որ նրա իշխող կուսակցությունը երկար ժամանակ սիստեմատիկորեն ստում է իր ժողովրդին։ Մարդիկ իրավունք ունեն իրենց կարծիքն արտահայտել բողոքի ակցիաների միջոցով։ Ցուցարարների նկատմամբ բռնությունն անհամաչափ է և խախտում է մարդու իրավունքները»,- նշել է նա։
Պատժամիջոցների ներքո են՝ «Վրացական երազանքի» պատվավոր նախագահ Բիձինա Իվանիշվիլին, Վրաստանի ՆԳՆ ղեկավար Վախթանգ Գոմելաուրին; ՆԳՆ ղեկավարի առաջին տեղակալ Շալվա Բեդոիձեն; ՆԳՆ ղեկավարի տեղակալներ Իոսեբ Չելիձեն, Ալեքսանդր Դարախվելիձեն; Գեորգի Բութուզին; Հատուկ հանձնարարությունների դեպարտամենտի ղեկավար Զվիադ Խարազիշվիլին, նրա տեղակալներ Միլերի Լագազաուրին, Միրզա Կեզեւաձեն; Պարեկային ոստիկանության դեպարտամենտի տնօրեն Վաժա Սիրաձեն; Վրաստանի ՆԳՆ Կենտրոնական քրեական ոստիկանության վարչության տնօրեն Թեյմուրազ Կուպատաձեն։
Արգելք են սահմանել նաև Լատվիան և Լիտվան։