ԱՄՆ և Ֆրանսիայի դեսպանատների հայտարարությունները իրականում համապատասխանաբար սեպտեմբերի 13-ի և 20-ի հայտարարությունների թարմացումներ են: Նոյեմբերյանում ու առհասարակ Տավուշում ոչ մի տարհանում էլ չկա: Այդ մասին հայտարարել է ՔՊ-ական Վահագն Ալեքսանյանը:
ՄԱԿ ԱԽ անդամ երկու երկրների, որոնք նաև Մինսկի խմբի համանախագահներ են՝ ԱՄՆ-ի և Ֆրանսիայի դեսպանատները զգուշացնում են ՀՀ քաղաքացիներին, ոչինչ չանող ՔՊ-ականներին, հայոց բանակին, թե որ ուղղություններից են ադրբեջանական զորքերն իրականացնելու հաջորդ ռազմական ագրեսիան: ԱՄՆ-ի և Ֆրանսիայի դեսպանատները դե-ֆակտո հետախուզական տվյալներ են հրապարակել՝ բաց աղբյուրներով նախազգուշացնելով հայոց բանակին և ՀՀ ռազմա-քաղաքական ղեկավարությանը, որ պետք է պատրաստվել նոր պատերազմին:
Իսկ ի՞նչ են անում ՔՊ-ականները. իհարկե՝ ոչինչ, պարզապես ՏԻՄ ընտրություններին ընդառաջ հանգստացնում են ՀՀ հպարտ քաղաքացիներին, որ Փաշինյանն ու թիմը նոր պատերազմ չեն բերելու Հայաստան և այդ կերպ բթացնում են ՀՀ քաղաքացիների զգոնությունը: Բանակը զինելու և սահմաններն ամրապնդելու փոխարեն ՔՊ-ականներ փորձում են հերքել կամ լղոզել գերտերությունների դեսպանատների հայտարարությունները՝ «խաղաղության» դարաշրջանի կեղծ, հայասպան թեզն առաջ տանելու և ՀՀ քաղաքացիների ուղեղների «լվացելու» համար:
Գերտերությունները փորձում են հուշել ՀՀ ռազմա-քաղաքական ղեկավարությանը, որ ՀՀ պետք է հույսը դնի միայն սեփական բանակի վրա՝ ՌԴ-ն ուկրաինական ճակատում դեռ երկար է պատերազմելու, ինչի մասին է խոսում ՌԴ-ում հայտարարված մասնակի մոբիլիզացիան: Այս պարագայում թուրք-ադրբեջանական զորքերն ոչ մի զսպող գործոն չունեն ՀՀ ու Արցախի դեմ նոր պատերազմ սանձազերծելու համար:
Հայոց բանակը պետք է ինքնակազմակերպվի, իսկ ՀՀ քաղաքացիները որևէ ՏԻՄ ընտրություններին չքվեարկեն ՔՊ-ի պես կապիտուլյանտ ուժի օգտին:
Վահրամ Բագրատյան