ԱԺ «Հայաստան» խմբակցության պատգամավոր Ագնեսա Խամոյանն այսօր կառավարության հետ հարցուպատասխանի ժամանակ Նիկոլ Փաշինյանին հարց ուղղեց «պոզով-պոչով մի կենդանու»՝ կոռուպցիայի մասին։

«Պարոն Փաշինյան, Դուք 2018 թվականից առ այսօր ամեն պատեհ-անպատեհ առիթով հայտարարում եք, որ երկրում համակարգային կոռուպցիա գոյություն չունի։ Բայց 2018 թվականից առ այսօր բազմաթիվ են դեպքերը, երբ բազմաթիվ պաշտոնյաներ կոռուպցիոն գործի կիզակետում են հայտնվել, կալանավորվել են և այլն։ Մի էդպիսի հրապարակում եղավ նաև նախորդ շաբաթ՝ ԱԱԾ-ի և ՔԿ-ի համատեղ օպերացիայի արդյունքում էկոնոմիկայի փոխնախարար ձերբակալվեց, ևս երեք պաշտոնյա ձերբակալվեցին։ Բայց խոսքս այդ դեպքի մասին չէ, այլ հետաքննող լրագրողների իրականացրած հետաքննության մասին էր, որոնք գնացել էին ՔՊ-ի քարոզարշավի համար հանգանակված գումարների հետևից, այցելել էին ձեր կուսակցությանը երկուսուկեսական միլիոն նվիրաբերած ընտանիքներին և պարզել էին, որ նրանցից շատերը անգամ տեղյակ չէին եղել, որ ձեր կուսակցության քարոզարշավի համար իրականացված դրամահավաքին գումարներ են նվիրաբերել։ Խոսքը 146 անձի մասին է, որոնք 2.5-ական միլիոն են նվիրաբերել, ընդհանուր գումարը կազմում է 350 միլիոն դրամ»,-ասաց Խամոյանը։
Ապա հարցրեց Փաշինյանին, որ ինքը, լինելով ՔՊ կուսակցության վարչության նախագահ, չի կարողանում իր կուսակցության ֆինանսական թափանցիկությունն ապահովել, ի՞նչ վստահություն պետք է ունենանք, որ նույնը կարողանում է իրականացնել վարչապետի պաշտոնում։

«Արդյոք սա համակարգային կոռուպցիա՞ չէ»,-հարցրեց պատգամավորը։

Փաշինյանն էլ ասաց, որ այդ թվում պատգամավորների բարձրացրած հարցերի պատճառով է, որ պետք է երկրում պետական ինստիտուտների կայացում տեղի ունենա, որովհետև մի պաշտոնյան և մի անձը ամեն տեղ չէ, որ կարող է թափանցիկություն ապահովել։

«Ես էլ տեսել եմ այդ հրապարակումը, և մենք էլ կուսակցության ներսում քննարկում ենք այդ իրավիճակները, և, բնականաբար, մտադիր ենք նաև պարզաբանել ու հասկանալ, թե ինչի մասին է  խոսքը կամ ինչի համար է տեղի ունեցել»,-ասաց Փաշինյանը։

Մանրամասն՝ տեսանյութում