Ռուսական ավիաընկերությունները, հետևելով ՌԴ նախագահ Վլադիմիր Պուտինի հայտարարություններին, 50% զեղչեր են սահմանել երեխաների համար տոմսերի վրա, պարզել է «ՌԻԱ Նովոստին»՝ հիմնվելով փոխադրողների հաղորդագրությունների վրա։

Դեկտեմբերի 19-ին ուղիղ եթերի ժամանակ Պուտինը խնդրեց կառավարությանը և ավիաընկերություններին մինչև հունվարի 14-ը կարգավորել բազմազավակ ընտանիքների համար արտոնություններ տրամադրելու հարցը։ Ինչից հետո ՌԴ տրանսպորտի նախարարությունից ՌԻԱ Նովոստիին հայտնել են, որ աշխատում են ավիաընկերությունների հետ՝ երեխաներ ունեցող ընտանիքներին տոմսերի 50% զեղչ տրամադրելու համար։ Մի շարք ընկերություններ ավելի վաղ հայտարարել էին, որ համապատասխան զեղչեր են սահմանում։

Ռուսաստանի Դաշնության փոխվարչապետ Վիտալի Սավելևը դեկտեմբերի 21-ին հաստատել է, որ ռուսական ավիաընկերությունները ֆիքսված 50% զեղչ կսահմանեն 2-ից 12 տարեկան երեխաների տոմսերի վրա։

Ռուսաստանի ամենամեծ ավիաընկերությունը՝ «Աերոֆլոտը», առաջինն արձագանքեց նախագահի խոսքին և դեկտեմբերի 23-ին հայտարարեց, որ սահմանում է ֆիքսված զեղչ՝ 50% էկոնոմ դասի բոլոր մատչելի ուղեվարձերի վրա՝ 2-ից 12 տարեկան երեխաների համար ավիատոմսեր գնելիս։ 

«Պոբեդա» ցածրարժեք ավիաընկերությունը (Աերոֆլոտ խմբի մաս) 50% պարտադիր զեղչեր է սահմանել մինչև 12 տարեկան երեխաների համար Ռուսաստանի տարածքով թռիչքների ժամանակ։ Այն կտարածվի հոկտեմբերի 28-ից գնված տոմսերի վրա:

Smartavia-ն ևս 50% զեղչեր է սահմանել մինչև 12 տարեկան և Ռուսաստանի քաղաքացիություն ունեցող երեխաների համար։ Նշված զեղչով տոմսերը կանոնավոր չվերթներով հնարավոր կլինի գնել 2025 թվականի հունվարի 1-ից տոմսարկղերում, իսկ 2025 թվականի հունվարի 10-ից ավիաընկերությունը առցանց ծառայությունները ևս կմիացնի նման տոմսերի վաճառքին։

Red Wings Airlines ավիաընկերությունը երեխաների համար 50% զեղչեր է տրամադրել Ռուսաստանի ներսում էկոնոմ դասի թռիչքների համար և 20% արտասահման թռիչքների համար: Ռուսաստանի Դաշնությունում երկուից մինչև 12 տարեկան երեխաների համար Red Wings-ի չվերթների տոմսեր գնելիս զեղչը ավտոմատ կերպով կիրառվում է 2024 թվականի դեկտեմբերի 27-ից: