Եղել են դեպքեր, որոնք անընդունելի են ինձ համար։ Օրինակ՝ ունևոր մի ընտանիք գնացել է հանգստանալու՝ օգտագործելով իր կապերը։ Դա մեծ արձագանք է ստացել։ Ես չեմ ընդունում, որ մարդ մի քանի տոննա բենզին փոխանակում է միայն իր ընտանիքին պետքական այլ բաների հետ՝ այն դեպքում, երբ շտապ օգնության մեքենաները, կարող է, վառելիքի խնդիր ունենան շուտով։ Այդ վառելիքը կարող էր զգալի թեթևացնել մեր բոլորիս հոգսերը։ Այս մասին ֆեյսբուքյան ուղիղ եթերում ասել է Արցախի պետնախարար Ռուբեն Վարդանյանը։
Նրա խոսքով, ընդունելի չէ խանութների տերերի այն քայլը, որ պահում են ապրանքը և իրենց բարեկամներին ու ծանոթներին են տալիս։
«Չեմ հասկանում այն մարդկանց, ովքեր տասնյակ լիտրերով ձեթ են առնում։ Ինչ ունենք, պետք է կարողանանք կիսել միմյանց միջև։ Բոլորս ենք բլոկադայի մեջ։ Չեմ ընդունում նաև այն, որ գալիս ասում են՝ էս մարդը միլիոններ ունի, բայց պատասխանատվութուն չեն կրում իրենց խոսքերի համար»,- նշել է Արցախի պետնախարարը։
Նա նաև նշել է, որ իրավիճակը լուրջ է, «մենք բոլորս բլոկադայի մեջ ենք, բոլորս մի նավի մեջ ենք»։