Գեղարքունիքի մարզի Փոքր Մասրիկ գյուղում ապրող Խաչատրյանների ընտանիքը 4 ամիս է՝ սպասում է որդու՝ 33-ամյա Շիրազ Խաչատրյանի մարմինը Կուտականի դիրքերից դուրս բերելուն։

Շիրազ Խաչատրյանը զոհվել է 2022 թվականի սեպտեմբերյան մարտերի ընթացքում, մարմինը մնացել է միջդիրքային գոտում, մինչեւ այսօր ադրբեջանական կողմը չի թույլատրում մոտենալ դիրքին։ Հարազատները տեսանկարահանող սարքերով գտել են Շիրազի մարմինը, պարբերաբար հետեւում են, թե ինչպես է իրենց որդու մարմինը ոսկրանում։

NEWS.am-ին Շիրազի կինը՝ Մարիամը, պատմում է, որ ամուսինն արձակուրդում էր, երբ զանգեցին ու տագնապով կանչեցին զորամաս. «Ասաց՝ դու չզանգես, ես քեզ կզանգեմ ու այդպես էլ չզանգեց։ Հաջորդ օրը պարզվեց, որ Շիրազին խփել են, գյուղում տարբեր լուրեր էին շրջանառվում, հստակ որեւէ բան չկար»։

Համածառայակիցները Խաչատրյանների ընտանիքին պատմել են, որ 12 զինծառայողից միայն Շիրազն է զոհվել, մյուսները կարողացել են լքել մարտի դաշտը։

Հարազատները դիմել են միջազգային տարբեր կառույցների, այդ թվում՝ Եվրոպական դատարան. «Առայժմ որեւէ մեկը չի կարողանում դուրս բերել Շիրազին։ Մեր միակ խնդիրն է, որ գոնե ոսկորները հանեն այդ գոտուց, տան մեզ»։

33-ամյա պայմանագրային զինծառայողը երկու երեխա ունի։ Կինը պատմում է, որ ամսվա 15 օրը աշխատանքի էր գնում, մյուս 15 օրը՝ գյուղում ջրհոր փորում։

«2019-ին Շիրազը մեկնեց Ռուսաստանի Դաշնություն՝ աշխատանքի, 2020 թվականին մենք էլ գնացինք ընտանիքով, երեխան դպրոց պետք է հաճախեր, Շիրազն ասում էր, որ պետք է հայկական դպրոց գնա, մենք վերադարձանք Հայաստան եւ մեկ ամիս անց սկսվեց 44-օրյա պատերազմը։ Շիրազի նպատակը տուն գնելն էր, փակովի տարբերակով տուն վերցրինք ու 44-օրյա պատերազմին իրեն պավեսկա տվեցին, ինքը գնաց, ես երեխաներիս հետ մնացի մենակ։ Գնաց պատերազմում կռվեց, վերադարձավ, չկարողացանք տան գումարը վճարել, մեր ձեռքից տունը վերցրին։ Եվ հիմա ես խնդրում եմ, որ բերեն Շիրազի մարմինը. տուն չունեցավ, գոնե գերեզման ունենա»,- ասում է Մարիամը։

Խաչատրյանների տան բակից երեւում են Կուտականի դիրքերը. «Ամեն անգամ դուրս եմ գալիս տան բակ, նայում եմ դիրքերին ու խոսում Շիրազի հետ, ցավ եմ ապրում, որ այդքան մոտ ու անհնար է դարձել նրան տեսնելը։ Մեր կյանքը դժոխք է դարձել, ինչքան նպատակ կար ջուրն է ընկել»։

Նշենք, որ սեպտեմբերյան մարտերից հետո անհետ կորած են համարվում 3 զինծառայող՝ Շիրազ Խաչատրյանը, Վահե Թորոսյանը եւ Թոռնիկ Սարգսյանը։ Երկու օր առաջ լրագրողների հետ հանդիպմանը վարչապետ Նիկոլ Փաշինյանին լրագրողներից մեկը ներկայացրել է Շիրազի դեպքը։ Փաշինյանն իր մոտ նշումներ է կատարել եւ խոստացել զբաղվել այդ խնդրով։