MediaHub-ն ամեն օր բազմաթիվ ահազանգեր է ստանում քաղաքացիներից, որ առանց զգուշացնելու տարբեր հասցեներում լույս չի լինում։ Հոսանք չի լինում ոչ թե այն հասցեներում, որոնց մասին «Հայաստանի էլեկտրական ցանցերը» տեղեկացնում է, այլ երեկոյան՝ ուրիշ հասցեներում։
Օրինակ՝ մեզ ահազանգած քաղաքացին նշում է, որ աշխատանքից վերադառնալիս լույս չի լինում, արդեն որերորդ օրն է, բացի լույսից նաև ջրերն են անջատում։
«Ո՛չ տեղեկացնում են, որ լույս չի լինելու, ո՛չ տեղեկացնում են, որ ջուր չի լինելու։ Այս շոգ եղանակին մարդկանց ուղղակիորեն «ձեռք են առնում» և ոտնահարում են մեր իրավունքները։ Շոգ է, ո՛չ կարող ես օդորակիչ միացնել, ո՛չ սառը ջուր կա»,- ասաց մեզ ահազանգած քաղաքացիներից մեկը։
MediaHub-ը կապ հաստատեց «Հայաստանի էլեկտրական ցանցեր» փակ բաժնետիրական ընկերության հետ՝ հասկանալու ի՞նչն է պատճառը, որ առանց զգուշացնելու տարբեր հասցեներում էլեկտրամատակարարումն անջատվում է, այն էլ երեկոյան, արդյո՞ք անգամ երեկոյան են աշխատանքներ տարվում։
«Հայաստանի էլեկտրական ցանցերից» մեզ տեղեկացրին, որ պատճառը դեռ տեղի ունեցած խոշոր հրդեհի հետևանքներն են։
«Ինչպես գիտեք, տեղի է ունեցել խոշոր հրդեհ, տարվում են աշխատանքներ, աշխատանքները կավարտվեն օգոստոսի 10-ին»,- փոխանցեցին «ՀԷՑ»-ից։
MediaHub-ը կապ էր հաստատել նաև «Վեոլիա Ջուր» ընկերության հետ, որտեղից մեզ փոխանցել էին, որ հստակ չեն կարող ասել՝ ջրանջատումների պատճառները որոնք են, քանի որ դա կախված է, թե որ շրջաններում ինչ աշխատանքներ են տարվում, և հորդորել էին գրավոր հարցում ուղարկել։ «Վեոլիա Ջուր»–ն ամեն տարի չի կարողանում բացատրել, թե ինչո՞ւ է ջրի խնայողությունը լինում ամենաշոգ ժամանակահատվածում։
Սակայն, այս տարի և՛ «ՀԷՑ»-ը, և՛ «Վեոլիա Ջուր»–ը ամռան շոգին մարդկանց թողել են առանց լույս ու ջուր, մարդիկ հիշել են «մութ ու ցուրտ տարիները»։ Շարունակում են ոտնահարել քաղաքացիների իրավունքները, իսկ պաշտպանությունն այս երկրում որևէ մեկին չի հետաքրքրում՝ ո՛չ պետական, ո՛չ մասնավոր ընկերություններին:
Մարիաննա Արամյան