Գերմանական Volkswagen ավտոարտադրողը մինչեւ տասնամյակի վերջը կկենտրոնանա լյուքս դասի մեքենաների վրա՝ կրճատելով ներքին այրման շարժիչով մոդելների շարքը եւ, ընդհանուր առմամբ, ավելի քիչ մեքենաներ վաճառելով։ Այս մասին հայտարարել է VW-ի ֆինանսական տնօրեն Առնո Անտլիցը Financial Times-ին տված հարցազրույցում։
Նրա խոսքով՝ ընկերությունը պատրաստվում է կենտրոնանալ լյուքս դասի մեքենաների արտադրության վրա, որոնք ավելի շատ շահույթ են բերում։ Այժմ VW-ն աշխարհում զբաղեցնում է երկրորդ տեղը Toyota-ից հետո՝ վաճառված մեքենաների քանակով։ Բացի այդ, մինչ այժմ կորպորացիան հայտնի է եղել բավականին զանգվածային եւ բյուջետային մեքենաներով, նշում է «Коммерсантъ»-ը։
Անթլիցը նշել է, որ ընկերությունը նպատակ ունի 60 տոկոսով նվազեցնել ներքին այրման շարժիչների եւ հիբրիդային մեքենաների քանակը Եվրոպայում։ VW ապրանքանիշերն այժմ արտադրում են նման մեքենաների մոտ 100 մոդել: «Առանցքային նպատակը աճը չէ։ Մենք ավելի շատ կենտրոնանում ենք որակի եւ շահութաբերության, քան ծավալների եւ բաժնետոմսերի վրա»,- ասել է նա։