Արցախյան առաջին պատերազմից հետո Արցախ տեղափոխված, իսկ 44–օրյա պատերազմից հետո էլ տեղահանված և կրկին ՀՀ-ում բնակություն հաստատած միայն մի քանի ընտանիքի են բնակարանի սերտիֆիկատներ տրվել։

«Բայց սերտիֆիկատը տալ մի խնդիր է, օգատագործելը՝ մեկ այլ։ Բանկային համակարգերի հետ կապված հարցեր կան, գնահատման հետ կապված հարցեր կան»,- MediaHub.am-ի հետ զրույցում նշեց Բերձորի քաղաքապետ Նարեկ Ալեքսանյանը։

Օգոստոսի 25-ից նոր տեղահանվածներին ևս սերտիֆիկատ չի տրվել, նույն որոշմամբ են կարգավորվում։
Այսօր Քաշաթաղի բնակիչներն ասել էին, որ Աշխատանքի և սոցիալական հարցերի նախարարությունից առաջարկել են սահմանամերձ գյուղերում տուն գնել կամ էլ կառուցապատել՝ 14 և 16 մլն դրամ վարկով։
«Իհարկե նոր առաջարկ է, բայց կրկին խնդիրներ են առաջանալու, դա լուծում չէ»,-նշեց նա։

MediaHub.am-ը զրուցեց նաև Ներքին Սուսի գյուղապետ Մխիթար Ներսիսյանի հետ, որն էլ նշեց, որ բնակիչները օնլայն գրանցվել են բնակարանի սերտիֆիկատ ստանալու համար, բայց այս պահին որևէ բնակչի այն չի տրվել։

Հիշեցնենք, որ Արցախի Քաշաթաղի շրջանի Բերձորը, Ներքին Սուս և Աղավնո համայնքներն ադրբեջանցիների վերահսկողության տակ են անցել օգոստոսի 25-ից։ Բնակիչներին Արցախի կառավարությունից խոստացել էին փոխհատուցման գործընթացը սկսել սեպտեմբերի 2 –ից։ Օրերս Քաշաթաղի 44-օրյա պատերազմից և այս տարվա օգոստոսի 25-ից տեղահանվածները ակցիա էին իրականացնում։

Անի Գևորգյան