Երկուշաբթի լույս հունվարի 2-ի գիշերը պայթյուններ որոտացել են Դամասկոսից հարավ։ Սիրիական SANA պետական ​​գործակալությունը հայտարարում է իսրայելական բանակի հերթական հարվածի մասին։ SANA-ն հայտնում է, որ հարվածը հասցվել է Դամասկոսի օդանավակայանի թիրախներին։ Պատճառվել է վնաս, առնվազն երկու սիրիացի զինվոր է զոհվել, ևս երկուսը վիրավորվել են։ Դամասկոսի միջազգային օդանավակայանը չի գործում:

Նշված վայրում  գտնվում են սիրիական բանակի կողմից կռվող իրանամետ շիա կազմավորումների դիրքերը։ 

Ավելի վաղ SANA գործակալությունը, հղում անելով ռազմական աղբյուրին, հայտնել էր, որ Սիրիայի մայրաքաղաքի օդանավակայանը նյութական վնաս է կրել, և այն ժամանակավորապես դադարեցրել է աշխատանքը։ «Իսրայելի ագրեսիվ գործողության հետևանքով Դամասկոսի օդանավակայանը շահագործումից հանվել է», – ասել է աղբյուրը՝ մատնանշելով, որ մի շարք հրթիռային հարվածներ են հասցվել Տիբերիա լճի օդային տարածքից։ Նրա խոսքով՝ երկու սիրիացի զինվոր է զոհվել, ևս երկուսը վիրավորվել են։