Ամերիկայի Միացյալ Նահանգների Կոլորադո նահանգում միայնակ մայրը պատահաբար հայտնաբերել է, որ իր երեխաները կերել են իրենց նախապապի աճյունափոշին։ Այս մասին գրել է People-ը։
Մոնիկա Լոնգը երեք տղաների միայնակ մայր է՝ 14 տարեկան, երեք տարեկան և երկու տարեկան։ Նա խոստովանել է, որ շատ դժվար է և գրեթե անհնար է բոլորին հետևել և տանը կարգուկանոն պահպանել։ Մի օր Լոնգը հյուրերի է սպասելիս եղել և մաքրություն արել մինչև նրանց ժամանումը։ Նա մի պահ մտել է լոգարան՝ փոքր երեխաներին թողնելով սենյակում։ Կնոջ խոսքով՝ ինքը բացակայել է ընդամենը չորս րոպեով, սակայն այդ ընթացքում երեխաներին հաջողվել է խառնաշփոթ ստեղծել։
Երբ Լոնգը դուրս է եկել լոգարանից, տեսել է երեխաների շուրջ շատ փոշի՝ նույնիսկ նրանց շուրթերին: Կինը բացատրել է, որ ժամանակ չի ունեցել պարզելու, թե կոնկրետ ինչ են ցրել տնով իր որդիները։ Նա պարզապես փոշեկուլով մաքրել է սենյակը, լվացել երեխաներին ու մոռացել դրա մասին: Միայն մի քանի օր անց Լոնգը հասկացել է, թե ինչ է տեղի ունեցել։ Նա գտել է դատարկ տարա, որտեղ պետք է լիներ իր պապի մոխիրը։ Պարզվել է, որ կնոջ որդիները մասամբ կերել են այն. նրանց շուրթերին ոչ թե սովորական փոշի է եղել, այլ աճյունափոշի։
Լոնգն ասել է, որ միտումնավոր թաքցրել էր աճյունափոշու տարան վերևի դարակներում, բայց իր որդիները նաև սովորել էին հասնել դրանց: «Ես նրանց շատ եմ սիրում, բայց Աստված իմ, ես չգիտեի՝ ծիծաղե՞մ, թե՞ լացեմ»,- խոստովանել է կինը։ Նա տատիկին պատմել է կատարվածը. Նա պարզապես ծիծաղել է և նշել, որ իր մոտ դեռ մնացել է իր ամուսնու՝ տղաների նախապապի մոխիրը։