Արդեն 29 և ավելի տարի ապրում եմ Բերձորում, ինձ դժվար է, ծանր գիտակցել դա, ինչպե՞ս ենք թողնելու մեր բնակավայրն ու դուրս գալու։ Այս մասին MediaHub.am-ի հետ զրույցում ասաց Բերձորի բնակիչներից Մարիամ Զադոյանը՝ խոսելով Բերձորը Ադրբեջանին հանձնելու հնարավորության մասին։

«Այնուամենայնիվ, մեր առօրյայով դեռ շարունակում ենք ապրել։ Դեռ ոչ ոք չի եկել մեզ հետ չի զրուցել։ Փաշինյանի հայտարարություններին լավ տեղյակ ենք, որ, ըստ նրա, Բերձորն ու Աղավնոն պետք է անցնեն Ադրբեջանի վերահսկողության տակ։ Մենք ապշած ենք»,- ասաց Մարիամը։

Բերձորի բնակիչը հիասթափությամբ նշեց․

«Ինչ կա մեր ձեռքը, որ անենք, բոլորս մեր մեջ խոսում ենք, բարկանում, որ չենք թողնելու մեր բնակավայրը, մեր հողը, բայց ինչպես, մենք իսկապես չգիտենք մեր անելիքը»։

Խոսելով շաբաթներ առաջ Նիկոլ Փաշինյանի ասուլիսի ժամանակ արած հայտարարության մասին, թե երթուղի փոխվելու պարագայում Աղավնոն և Բերձորը կանցնեն Ադրբեջանի վերահսկողության տակ, վերջինս ասաց․

«Այդ հայտարարությունից բոլորս էինք սթրեսի մեջ, ոնց կարող ենք թողնել ամեն բան ու գնալ, ստացվում է, որ երկրորդ անգամ ենք անցնելու վատ իրավիճակի ու ապրումների միջով․ սկզբից պատերազմն իր աղետալի հետևանքներով, հիմա էլ այս տեղահանումը, ի՞նչ ենք անելու, ո՞ւր ենք գնալու, կառավարությունը միայն նշում է, թե ապահովելու է բնակարաններով, ուր են բա այդ տները՞, ինչ-որ մեկին տեղավորե՞լ են։ Գիտեմ, ծրագիր կա, բայց դեռ չի գործում։ Մինչև աչքով չտեսնեմ, որ հայրենակիցներիցս ինչ-որ մեկը տուն է ստացել, չեմ հավատա»։

Հարցին արդյոք բնակարանով ապահովելու պարագայում, կցանկանան գնալ իրեց տներից․ Մարիամը նշեց, որ պարզապես չունեն այլ տարբերակ․

«30 տարի ապրել, արարել են Բերձորի բնակիչներն այս հողի վրա, ոչ ոք բերձորցիներից չէր ուզի իր տունը հեշտ ու հանգիստ զիջել թշնամուն, բայց տեսել եք՝ ինչպես են պատերազմից հետո ժամ դրել բնակիչների վրա, որ այսինչ օրը, այսինչ ժամին լքեն բնակավայրերը, այդ ո՞վ կուզեր թողներ իրենց տնից գնար, օրը գալու է և մենք էլ ստիպված ենք լինելու դուրս գալ, հո չենք մնալու թուրքերի հետ ապրենք»։

Նիկոլ Փաշինյանն իր հայտարարության մեջ նշել էր, որ, ըստ էության, Բերձորում ընտանիքներ չկան և իրենց հարցերը լուծված են։ Անդրադառնալով այս թեմային՝ Բերձորի բնակիչը նշեց․

«Ես ապշած եմ, ինչպես կարող է երկրի ղեկավարը չիմանալ, որ Բերձորում ապրում են ընտանիքներ, նույնիսկ չեմ կարողանում մեկնաբանել, չեմ հասկանում՝ ինչի համար է նման մեկնաբանություն հնչեցվել։ Մենք այստեղ ենք, ապրում ենք, վիրավորական է շատ, երբ երկրիդ ղեկավարն անտեսում է մեր գոյությունը»,- հավելեց Մարիամը։

Մերի Գևորգյան