Մոսկվայի բնակիչը գրեթե մեկ միլիոն ռուբլի է մուտք արել բանկոմատ, չի սպասել գործարքի հաստատմանը ու խոշոր գումար է կորցրել։ Գրել է Baza տելեգրամյան ալիքը։
Նոյեմբերի 11-ին 35-ամյա Վլադիմիրը որոշել է հիփոթեքի վճարում կատարել 2 միլիոն ռուբլու չափով։ Նա եկել է բանկոմատ, որը քաղաքի առևտրի կենտրոններից մեկում է եղել։ Նա կատարել է 1 միլիոն ռուբլու երկու վճարում։ Տղամարդը գումարի առաջին մասը դրել է բանկոմատ ու սպասել գործարքի հաստատմանը։ Սակայն մնացած 995 հազար ռուբլին դնելուց հետո Վլադիմիրը չի համոզվել, որ բանկոմատն ընդունել է գումարն ու հեռացել է։
10 րոպե անց տղամարդը պարզել է, որ գումարը չի մուտքագրվել։ Նա զանգահարել է հաճախորդների սպասարկում ու բանկի աշխատակիցը հայտնել է, որ մեքենան չի ընդունել գումարը ու վերադարձրել է այն։ Վլադիմիրը վազել է դեպի բանկոմատը, սակայն մեծ գումարն արդեն չի եղել։ Տղամարդն անմիջապես դիմել է ոստիկանություն։
Շուտով իրավապահներին հաջողվել է գտնել բանկոմատից գումարը հափշտակած անձին։