Առավոտյան ուտելուց առաջ մեկ բաժակ ջուր խմելը օգտակար սովորություն է, միևնույն ժամանակ պետք է մի շարք գործոններ հաշվի առնել, ՌԻԱ Նովոստիի հետ զրույցում ասել է բժիշկ–սննդաբան, գաստրոէնտերոլոգ, խոհարարական բլոգեր Նուրիա Դիանովան։
Երբ մարդը նախաճաշից առաջ սոված փորին ջուր է խմում, օրգանիզմն արթնանում է, ակտիվանում են մարսողության գործընթացներն ու աղեստամոքսային տրակտի աշխատանքը։ Առավոտյան ուտելուց առաջ պարբերաբար ջուր խմելը կարգավորում է աղիների միկրոֆլորան, մաշկը մաքրվում է, բարձրանում է տրամադրությունը։
«Ակտիվանում են բոլոր գործընթացները` ստամոքսը կանոնավոր է գործում, մարդը լավ տրամադրություն, մաքուր մաշկ, կարգավորված միկրոֆլորա է ունենում։ Գաստրոէնտերոլոգիայի տեսանկյունից սկսում է գործել հիմնական ռեֆլեքսներից մեկը` աղեստամոքսայինը, այսինքն` սոված փորին ջուր ստանալով` օրգանիզմը խթանում է աղիների պերիստալտիկան», – նշել է Նուրիա Դիանովան։
Սակայն նման արդյունք ամեն ջուր չէ, որ կարող է ապահովել։
«Ջուրը պետք է լինի սենյակային ջերմաստիճանի, ոչ սառը, հատկապես եթե փորկապության հակվածություն կա, իսկ նման խնդիր ունի քաղաքային բնակչության շուրջ 80%–ը», – ասել է նա։
Եթե մարդը ցավեր է ունենում որովայնի շրջանում, ապա պետք է սենյակային ջերմաստիճանից ավելի տաք ջուր խմի։
Բժիշկը նշել է, որ ջրով բաժակի մեջ կիտրոնի կամ նարնջի հյութ կարող են ավելացնել միայն նրանք, ովքեր աղեստամոքսային տրակտի հիվանդություններ չունեն։