Արցախի Հանրապետությունում կապ ապահովող օպերատորը կրկին դարձել է «Ղարաբաղ Տելեկոմը»։ Ըստ շրջանառվող լուրերի՝ մասնաբաժիններ ունեն Արցախի նախագահ Արայիկ Հարությունյանը և ՀՀ նախկին փոխվարչապետ Տիգրան Ավինյանը:

Տվյալի առնչությամբ MediaHub.am-ը կապ հաստատեց Արցախի նախագահի մամուլի պատասխանատու Լուսինե Ավանեսյանի հետ, ով նշեց․

«Արցախի Հանրապետության նախագահի` «Ղարաբաղ Տելեկոմ» ընկերությունում մասնաբաժին ունենալու մասին խոսակցությունները իրականությանը չեն համապատասխանում»։

MediaHub.am-ը կապ հաստատեց նաև ՀՀ նախկին փոխվարչապետ Տիգրան Ավինյանի հետ․ սակայն վերջինս չցանկացավ լսել հարցը․

«Առհասարակ, որևէ մեկնաբանություն չեմ տալիս որևէ հարցի առնչությամբ։ Երբ ժամանակը գա, անպայման այդ հնարավորությունից MediaHub-ն էլ կօգտվի»,- ասաց Ավինյանը։

Արցախի ԱԺ «Արդարություն» խմբակցության պատգամավոր Դավիթ Գալստյանը, անդրադառնալով տվյալ թեմային, նշեց․

«Այն, որ մենաշնորհներն առհասարակ պետության տնտեսության համար շատ վատ երևույթներ են, դա փաստ է, ցանկացած մենաշնորհ թույլ չի տալիս, որ տնտեսությունը զարգանա։ Այն, որ նախորդ օպերատորն ավելի լավ էր աշխատում, դա միանշանակ էր, սակայն Արցախի նախագահի պարզաբանմամբ՝ նախորդ օպերատորին առաջարկվել է լիցենզավորվել և օրինական դաշտ մտնել, սակայն հրաժարվել է։ Որքանով է դա ճիշտ, ասել չեմ կարող, քանի որ լավ ինֆորմացված չեմ։ Սակայն, միանշանակ է, երբ կար նախորդ օպերատորը, կար առողջ մրցակցություն կապի առումով, այն որակյալ էր։ Այս կապի ժամանակ արդեն լինում են բազմաթիվ խնդիրներ։

Սեփականատերերի մասով կարող եմ նշել միայն այն, որ նախագահ Հարությունյանը նշել էր, որ սեփականատերեր են փոխվել, սակայն թե ովքեր են՝ չի մանրամասնել, իսկ պատերազմի օրերին խափանումները կապում էին հին սեփականատերերի հետ»,- ասաց Գալստյանը։

Մերի Գևորգյան