ԱՄՆ-ից 34-ամյա Խուան Կառլոս Լա Վերդեն ողջ է մնացել Ֆլորիդայի Տոնոտոսասա լճում մարզվելիս ալիգատորի հարձակումից հետո, հաղորդում է Tampa Bay Times-ը։

Միջադեպը տեղի է ունեցել օգոստոսի 3-ին, երբ Լա Վերդեն պատրաստվում էր լողի մրցույթին։ Տղամարդը լիճ է գնացել օգնականի հետ, որը տեսանկարահանել է նրա մարզումը դրոնի միջոցով: Լողալու  ժամանակ մարզիկն ինչ-որ բանի ուժեղ հարվածել է։

«Ամեն ինչ շատ արագ է  կատարվել, բայց ես զգացի այդ հսկայական կենդանու թեփուկները, լեզուն ու ատամները»,- հիշում է տուժածը։

Հարձակումը տևել է ընդամենը մի քանի վայրկյան։ 3,5 մետր երկարությամբ ալիգատորին հաջողվել է կծել գանգը և վնասել Լա Վերդեի մարմնի վերին մասը։ Տղամարդուն հաջողվել է փախչել գիշատչի բերանից և լողալով հասնել մոտակա նավամատույցը։ Ափին նա հանդիպել է երկու երեխաների, ովքեր զանգահարել են իրենց մորը, ով էլ շտապօգնություն է կանչել։