ՍԴ դատավոր Հրայր Թովմասյանը, նրա կինը՝ Լամարա Խուդավերդյանը, դուստրերը՝ Գոհար և Մերի Թովմասյանները, նրանց փոխկապակցված ևս երկու անձ՝ Սոնա Խուդավերդյանը և Ռուբիկ Ղազարյանը հրավիրվել են ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն, սակայն նրանցից ոչ մեկը դեռ չի ներկայացել։ Այս մասին MediaHub.am-ին տեղեկացրեց Հայաստանի գլխավոր դատախազի խորհրդական Գոռ Աբրահամյանը։ 

«Սպասում ենք, որ իրենք կամ իրենց ներկայացուցիչները ներկայանան, ծանոթանան նյութերին, իրենց դիրքորոշումը հայտնեն, ըստ դրա, հետագա ընթացքի հարցը կլուծվի։ Ներկայանալու ամսաթիվը մինչև սեպտեմբերի 7-ն է նշված»,-ասաց նա։ 

Տեղեկացնենք, որ Թովմասյանը ծանուցվել է «Ապօրինի ծագում ունեցող գույքի բռնագանձման մասին» ՀՀ օրենքի 16-րդ և 17-րդ հոդվածներով։ Նշվում է, որ Հայաստանի Հանրապետության գլխավոր դատախազության ապօրինի ծագում ունեցող գույքի բռնագանձման գործերով վարչությունում վերջինիս պատկանող գույքի առնչությամբ իրականացվել է ուսումնասիրություն, որի արդյունքում կազմվել է ամփոփագիր: 

Լիաննա Թորոսյան