«Ողջունում ենք ՄԱԿ-ի Արդարադատության միջազգային դատարանի այսօրվա որոշումը, որ Ադրբեջանը պետք է ձեռնարկի բոլոր միջոցները՝ դադարեցնելու շրջափակումը և ապահովելու մարդկանց, տրանսպորտային միջոցների և բեռների անարգել տեղաշարժը Լաչինի միջանցքով»,–Twitter-ի իր էջում գրել է ՀՀ ԱԳ նախարար Արարատ Միրզոյանը։
«Ուրախ ենք տեսնել, որ ճշմարտությունը հաղթեց, քանզի դատարանն ամբողջությամբ մերժեց Ադրբեջանի հակընդդեմ հայցը»,- նշել է նա։
Ավելի վաղ հայտնել էինք, որ Արդարադատության միջազգային դատարանը հրապարակեց Լաչինի միջանցքով ապաշրջափակման վերաբերյալ ժամանակավոր միջոց կիրառելու պահանջի մասին որոշումը։
Ըստ այդմ՝ դատարանն իր որոշմամբ պարտավորեցրեց Ադրբեջանին իր ստանձնած պարտականություններով ապահովել տրանսպորտի և մարդկանց անխափան տեղաշարժը Լաչինի միջանցքով՝ երկու ուղղություններով։ Այս մասին Ֆեյսբուքի իր էջում գրել է ՀՀ հատուկ հանձնարարություններով դեսպան Էդմոն Մարուքյանը:
Ըստ որոշման՝ դատարանը համարում է, որ սննդամթերքի, դեղորայքի պակասը անդառնալի հետևանք կարող է առաջացնել մարդկանց կյանքի համար։ Ադրբեջանի կողմից գազամատակարարման դադարեցումների վերաբերյալ Հայաստանի ներկայացրած ոչ բավարար ապացույցները հիմք չհանդիսացան ևս մեկ պարտավորության համար։