Ինչպես ավելի վաղ հայտնել էինք, մայիսի 20-ին` ժամը 06:55, Ճգնաժամային կառավարման ազգային կենտրոն ահազանգ է ստացվել, որ Երևանի Լենինգրադյան փողոցից դեպի Ծիծեռնակաբերդի խճուղի տանող հատվածում տեղի է ունեցել ճանապարհահատվածի փլուզում, ինչի հետևանքով խճուղին շարունակում է երկկողմանի փակ մնալ: Դեպքից արդեն 4 օր անց դեռևս տվյալ հատվածը երկկողմանի փակ է։ MediaHub.am-ը կապ հաստատատեց Երևանի քաղաքապետարանի լրատվական վարչության հետ՝ հասկանալու՝ այս պահին ինչ փուլում են փլուզված հատվածի վերականգնման աշխատանքները:
Վարչությունից փոխանցեցին, որ հենապատի կառուցման համար հնարավորինս արագ տարվում են աշխատանքներ․ «Դա իրենից ենթադրում է բավական երկար տեխնիկական գործընթաց, որը պետք է ինքնանպատակ չլինի, այլ լինի մասնագիտորեն ուսումնասիրված։ Ամենաշահագրգռվածն այս պահին քաղաքապետարանն է, որպեսզի հարակից ճանապարհների ծանրաբեռնվածություն չունենանք»՝ վարչությունից հավելեցին նաև, որ պայմանավորվածություն է ձեռք բերվել՝ աշխատանքները կազմակերպել եռահերթ՝ նաև գիշերային ժամերին, որպեսզի կարճ ժամանակահատվածում գործընթացն ավարտվի և ճանապարհի երկկողմանի երթևեկությունը բացվի:
MediaHub.am-ը քիչ առաջ Ծիծեռնակաբերդի խճուղում էր, որտեղ «Սահակյանշին» ընկերության պատասխանատուն նշեց, որ այս պահին արդեն ընթանում են վերականգնման աշխատանքներ․ «24 ժամ աշխատում ենք, որ արագ ավարտին հասցնենք և ճանապարհն անցանելի լինի»,- նշեց ընկերության պատասխանատուն։ Նշենք, որ ավելի վաղ Երևանի քաղաքապետարանի լրատվության վարչության պետ Լևոն Սարդարյանը նշել էր, որ Երևանի Լենինգրադյան փողոցից դեպի Ծիծեռնակաբերդի խճուղի տանող հատվածում տեղի ունեցած ճանապարհահատվածի փլուզման պատասխանատուն «Սահակյանշին» շինարարական կազմակերպությունն է, ով թերացել է ճանապարհի շինարարական աշխատանքները պատշաճ իրականացնելու ժամանակ։
Ծիծեռնակաբերդի խճուղու փլուզված հատվածի վերաբերյալ մանրամասները՝ Mediahub.am-ի տեսանյութում