Լիբանանի խորհրդարանի խոսնակ Նաբիհ Բերին շաբաթ օրը հայտարարել է, որ նոր նախագահ ընտրելու համար նիստ չի հրավիրի, քանի դեռ օրենսդիր մարմինը չի կատարել բարեփոխումները, որոնք նախապայման են Արժույթի միջազգային հիմնադրամի (ԱՄՀ) օգնությունը ստանալու համար, հաղորդում է Reuters-ը:

Արժույթի միջազգային հիմնադրամի գործարքը դիտարկվում է որպես Լիբանանի համար քաղաքացիական պատերազմից հետո ամենաապակայունացնող ճգնաժամի մեջ հայտնված ֆինանսական փլուզումից հետո վերականգնվելու միակ միջոցը:

Նախագահ Միշել Աունի վեցամյա ժամկետն ավարտվում է հոկտեմբերի 31-ին, եւ բարձրաստիճան քաղաքական գործիչները մտահոգություն են հայտնել, որ իրավահաջորդը չի գտնվի՝ զգուշացնելով ավելի շատ ինստիտուցիոնալ փակուղու մասին, քանի որ Լիբանանը նաեւ մայիսից լիարժեք գործող կառավարություն չունի:

«Ես նախագահական ընտրությունների կոչ չեմ անի, քանի դեռ չեն ընդունվել ԱՄՀ-ի կողմից պահանջվող բարեփոխումների օրենքները»,- Բեյրութի իր նստավայրում լրագրողներին ասել է Բերին

Նա ասել է, որ խորհրդարանը պետք է աշխատի օգոստոսին բարեփոխումների օրենքներ ընդունելու ուղղությամբ՝ մատնանշելով այդ միջոցառումների հրատապ անհրաժեշտությունը:

Բերին, որը պաշտոնավարում է շուրջ երեք տասնամյակ, ուրբաթ օրը հայտարարել է, որ շուտով կառավարություն ձեւավորելու համար «հրաշք» կպահանջվի:

Սահմանադրության համաձայն, նախագահը նոր վարչապետ նշանակելու մասին հրամանագիրը ստորագրում է խորհրդարանի անդամների հետ պարտադիր խորհրդակցության հիման վրա, եւ պետք է ստորագրի այն ցանկացած կաբինետի ձեւավորման դեպքում:

Ապրիլին Լիբանանը ԱՄՀ-ի հետ 3 միլիարդ դոլարի չափով համաձայնություն է ձեռք բերել՝ անձնակազմի մակարդակով, սակայն ամբողջական համաձայնությունը կախված է օրինագծերի ընդունումից, ներառյալ կապիտալի վերահսկողությունը, բանկերի վերակազմավորման օրենսդրությունը եւ 2022 թվականի բյուջեն:

Լիբանանի սահմանադրության համաձայն՝ խոսնակը պետք է խորհրդարանի նիստ գումարի «Հանրապետության նախագահի լիազորությունների ավարտից առնվազն մեկ եւ առավելագույնը երկու ամիս առաջ»։

Հակառակ դեպքում, ըստ սահմանադրության, պալատն ավտոմատ կերպով հավաքվում է՝ իրավասությունների ժամկետի ավարտին նախորդող 10-րդ օրը։