Քաղաքական թատրոնից դուրս եկած ու իրական թատրոն վերադարձած Երևանի նախկին քաղաքապետ Հայկ Մարությանի ներկայացմանն ընդառաջ մամուլում տեղեկություններ տարածվեցին, թե վերջինիս նկատմամբ նյութեր են նախապատրաստվում։ 

Ըստ մամուլի՝ Բագրևանդ թաղամասում անօրինական ռեստորանային համալիրի վերակառուցման թույլտվություն տրամադրելն է պատճառը։ MediaHub.am-ը տեղեկությունը փորձեց ճշտել մի քանի աղբյուրներից։ Քննչական կոմիտեի ՀՀ քննչական կոմիտեի նախագահի մամուլի քարտուղար Վարդան Թադևոսյանը փոխանցեց, որ տեղեկության հավաստի լինելը ճիշտ կլինի ճշտենք ՀՔԾ-ից։ ՀՔԾ-ից MediaHub.am-ին փոխանցեցին, թե մեր հնչեցրած հարցի շուրջ այս պահին որևէ տեղեկության չեն տիրապետում։

Իսկ Ոստիկանությունում, որն էլ հենց նշված էր սկզբնաղբյուրում, առհասարակ նյութեր չեն նախապատրաստվում։ 
Ստացվում է՝ գերատեսչություններից և ոչ մեկը տեղեկությունը ո՛չ հաստատում է, ո՛չ հերքում։ 

Նշենք, որ ըստ տարածված լուրի, Մարությանը 2019 թվականի փետրվարի 18-ին առանց նպատակային նշանակությունը փոխելու արդյունաբերական ընդերք օգտագործման և այլ արտադրական նպատակային նշանակության, Երևան քաղաքի Բագրևանդ փողոցի 110 հասցեում գտնվող հողամասում տրամադրել է «ռեստորանային համալիրի վերակառուցման, ընդլայման և նոր մակերեսով մասնաշենք կառուցելու» նախագծման և հետագայում նաև շինարարության թույլտվություն:

 Լիաննա Թորոսյան