Կրասնոդարի միջնակարգ դպրոցում իր հասակակիցների վրա դանակով հարձակված դեռահասը ծնողների հետ արտաքսվել է Հայաստան։
Այս մասին «Կոմերսանտ»-ին հայտնել են Կրասնոդարի երկրամասի ՀԱ ՆԳՆ գլխավոր վարչության մամուլի ծառայությունից:
Ավելի վաղ Կրասնոդարի Պրիկուբանսկի դատարանը դպրոցականին մեղավոր էր ճանաչել զենքի գործադրմամբ խուլիգանության համար ու դատապարտել 30 հազար ռուբլու տուգանքի։
Կրասնոդար քաղաքի թիվ 94 հանրակրթական դպրոցում միջադեպը տեղի է ունեցել անցյալ տարվա դեկտեմբերի 6-ին։ Դպրոցի միջանցքում աշակերտների միջև կոնֆլիկտի ժամանակ դեռահասներից մեկը դանակահարել էր հասակակցին ոտքի հատվածում։ Ծեծկռտուքի հետևանքով տուժել էին նաև այլ դպրոցականներ։ Ծեծկռտուք հրահրողը բերման էր ենթարկվել և տեղավորվել անչափահասների ժամանակավոր պահման վայրում։
Հետաքննության ընթացքում պարզվել էր, որ դեռահասի ծնողները, որոնք ՀՀ քաղաքացիներ են, ապօրինի են բնակվել Ռուսաստանում, և դատարանը որոշել է նրանց արտաքսել։ Կարգադրիչները ընտանիքին ուղեկցել են Միներալնիե Վոդի քաղաքի սահմանային հսկողության կետ, որից հետո դեռահասին և նրա ծնողներին օդային ճանապարհով արտաքսել են Հայաստան։
Թիվ 94 դպրոցում տեղի ունեցած միջադեպից հետո հարուցվել էր քրեական գործ՝ ուսումնական հաստատության աշխատակիցների անփութության դեպքի առթիվ։