2022 թվականին Եվրամիության երկրների բնակչության ընդհանուր թվաքանակը նվազել է՝ նախորդ տարվա հունվարին գրանցված 447 միլիոնից այս հունվարին դառնալով 446,8 միլիոն, հայտնել է «Եվրոստատ» եվրոպական վիճակագրական գործակալությունը։

Ըստ հետազոտության՝ հիմնական պատճառը մահացության աճն է․ մահերի թիվը գերազանցում է ծնունդների թվին ու միգրացիայի ցուցանիշին։ Բնակչության նվազման դինամիկան պայմանավորված է նաև կորոնավիրուսի համավարակի հետևանքներով։

«Եվրոստատ»-ի ուսումնասիրության համաձայն՝ չնայած ԵՄ բնակչության ընդհանուր նվազում կա, բայց այդ տենդենցը բոլոր երկրներում չէ, որ առկա է։ Բնակչության թվաքանակի ամենամեծ նվազումը գրանցվել է Իտալիայում (-253,1 000), ամենաքիչը՝ Սլովենիայում (-1,8 000)։ Ընդ որում, 17 երկրում բնակչության թվի աճ է գրանցվել․ամենաշատը Ֆրանսիայում՝ 185,9 000, ամենաքիչը՝ Էստոնիայում՝ 1,7 000։

Ըստ հետազոտության, ավելի երկար ժամանակահատվածում՝ 1960 թվականից մինչև 2022 թվականի հունվարի 1-ը, ԵՄ-ի բնակչությունը 354,5 միլիոն մարդուց աճել է մինչև 446,8 միլիոն մարդ, այսինքն, ավելացել է 92,3 միլիոն մարդով, սակայն վերջին տասնամյակներին աճի տեմպերը դանդաղել են։

2020 թվականին, 2019-ի համեմատ, ԵՄ-ում 531 000-ից ավելի մահ է գրանցվել, իսկ 2021 թվականին 113 000-ով ավելի շատ մահ է գրանցվել, քան 2020-ին։