2022 թվականը կադրային ջարդի առումով բավականին ակտիվ տարի էր։ Փաշինյանի ձայնը դարձած խորհրդարանական իշխանությունն այս տարի ազատվեց «նախկիններից մնացած» որոշ պաշտոնյաներից՝ նրանց փոխարեն բերելով հավատարիմ կադրերի։ Էլիտայի նոր ներկայացուցիչներից շատերը հիասթափություն առաջացրին հանրության շրջանում։
Ինչո՞ւ․ մի դեպքում պատճառն այն էր, որ հեռացողներն, իրոք, հանրության կողմից ընդունված էին, մյուս դեպքում՝ պարզապես նորերն ուղղակի ոչ կոմպոտենտ էին այդ պաշտոններին նշանակվելու համար։ Այսպես, հունվարի 24-ին խորհրդարանական մեծամասնությունը քվեարկեց ու Մարդու իրավունքների պաշտպանի պաշտոնում ընտրեց ՔրիստինՆե Գրիգորյանին։ 40-ամյա Գրիգորյանը 2019 թվականի հուլիսի 3-ից մինչ հունվարի 20-ը զբաղեցրել էր արդարադատության փոխնախարարի պաշտոնը։ Մինչ այդ էլ պետական համակարգում տարբեր պաշտոններ է զբաղեցրել։
Այս նշանակումը մեծ հիասթափություն առաջացրեց հանրության շրջանում, քանի որ Արման Թաթոյանին փոխարինելու եկած Գրիգորյանն ընդգծված քաղաքական հայացքներ ունի։ Ընդդիմության դիտարկմամբ՝ Գրիգորյանն ավելի շատ ոչ թե ՄԻՊ-ի պաշտոնն էր զբաղեցնելու, այլ՝ ՆԻՊ-ի (Նիկոլի իրավունքների պաշտպան)։ Եվ անցած մեկ տարին ցույց տվեց, որ Գրիգորյանի աշխատանքը գոհացուցիչ չէ․ մարդու իրավունքների ոտնահարման հստակ դեպքերի ժամանակ Գրիգորյանին գտնելը գրեթե անհնարին էր դառնում, իսկ հայտարարություններն ու արձանագրությունները, եթե այդպիսիք լինում էին, ոչնչի մասին էին։ Օրինակներից մեկը զոհված զինծառայողների ծնողների նկատմամբ ոստիկանության գործադրած բռնությունն ու դրա վերաբերյալ արձագանքն էր։
Երկրորդ և բավականին մեծ աղմուկ բարձրացրած կադրային փոփոխությունը գլխավոր դատախազ Աննա Վարդապետյանն է։ Փաշինյանի նախկին օգնականը ստանձնեց դատական իշխանության կարևորագույն ճյուղերից մեկի ղեկավարի պաշտոնը, ինչն, ըստ իրավաբանական հանրույթի, զուտ իշխանության չարդարացված քմահաճույքն ու դատական իշխանությանը ճնշելու հերթական քայլն է։ Բոլորի համար հարց էր, թե կկարողանա արդյո՞ք միայն իշխանական ուժի ձայներով ընտրված, 35-ամյա Վարդապետյանն անկախ ու անաչառ մնալ գլխավոր դատախազի դերում։ Այդ հարցին ինքն անձամբ չի պատասխանել, քանի որ խուսափում է լրագրողների հետ շփումից։
Աղմկահարույց էր նաև Սեդա Սաֆարյանի՝ ՍԴ դատավոր ընտրվելը։ Փաշինյանի կողմից Սաֆարյանի առաջադրումը բավականին հարցեր էր առաջացրել։ Հատկապես նրա այն ելույթից հետո, երբ ինքը հստակ հավատարմության խոստում տվեց Փաշինյանի իշխանությանը՝ նշելով, թե բոլոր նախկին իշխանությունները իրավական համակարգը հարմարացրել են իրենց քաղաքական շահերին:
Ըստ Ստյոպա Սաֆարյանի քրոջ, 2018-ից է, որ իշխանությունները հետապնդել են սահմանադրական ժողովրդավարական դառնալու նպատակ: Դրանից առաջ “ապօրինություններ են եղել, 20-ամյա ոչ ժողովրդավարական կառավարում, պետական ինստիտուտների անիրավչություն” և այլն, և այլն։
Սրանք միակ աղմկահարույց նշանակումները չեն, սակայն ևս մեկ անգամ ամբողջությամբ ի ցույց են դնում իշխանության որդեգրած քաղաքականությունը։
Նարե Գնունի