Միլիարդատեր Իլոն Մասկը Նյու Յորքում հանդիպել է ՄԱԿ-ում Իրանի մշտական ներկայացուցիչ Ամիր Սաիդ Իրավանիի հետ:
Հանդիպել են քննարկելու Միացյալ Նահանգների և Իրանի միջև լարվածությունը նվազեցնելու ուղիները, գրել է «The New York Times»-ը՝ վկայակոչելով իրանցի երկու անանուն պաշտոնյաների:
Մասկը և Իրավանին հանդիպել են երկուշաբթի օրը Նյու Յորքում, և նրանց «զրույցը կենտրոնացել է Իրանի և ԱՄՆ-ի միջև լարվածությունը նվազեցնելու վրա»:
Թերթի աղբյուրների փոխանցմամբ՝ միլիարդատիրոջ եւ Իրանի մշտական ներկայացուցչի հանդիպումը գաղտնի վայրում տեւել է ավելի քան 1 ժամ: Այն նախաձեռնել է Մասկը, իսկ վայրը ընտրել է Իրավանին։
«New York Times»-ի զրուցակիցները հանդիպումը որակել են որպես «դրական» ու «լավ նորություն»։
Ավելի վաղ ԱՄՆ նորընտիր նախագահ Դոնալդ Թրամփը հայտարարել էր, որ Մասկը նախագահի նախկին թեկնածու և ձեռնարկատեր Վիվեկ Ռամասվամիի հետ միասին կգլխավորի Կառավարության արդյունավետության դեպարտամենտը (DOGE):