Անհիմն շահարկումներ են, թե ՌԴ-ն հրաժարվում է տարածաշրջանից և ՀՀ-ից․ պաշտոնապես և կոշտ եմ արձագանքում։ Այս մասին լրագրողների հետ զրույցում ասաց Հայաստանում Ռուսաստանի դեսպան Սերգեյ Կոպիրկինը։
«Հայտնի են շատ քայլեր, որոնք ՌԴ-ն իրականացնում է։ Աշխատում են եռակողմ մեխանիզմները, դրանք հիմնված են եռակողմ պայմանավորվածությունների վրա, որոնք ձեռք են բերվել 2020, 2021 թթ-երին։ Դրանք հարցեր են, որոնք բոլոր կողմերի կարծիքով թույլ կտան բացել խաղաղության և զարգացաման ճանապարհը»,-ասաց նա։
Դեսպանի խոսքով, իրենք առկա ձևաչափը կարևորում են՝ չնայած խնդիրներին, մարտահրավերներին, և առաջնորդվում են նրանով, որ դրանց լուծման համար քաղաքական կամքը թե՛ հայկական, թե՛ ադրբեջանական կողմում կա։
«Մենք շարունակելու ենք աշխատել այդ ձևաչափով։ Դուք գիտեք, որ ռուսական ներկայություն կա այն շրջաններում, որոնք սահմանային առումով խնդրահարույց են՝ այնտեղ մեր խաղաղապահներն են, սահմանապահները։ Բնականաբար, կոնտակտի մեջ ենք երկու կողմերի հետ, ինչը կարևոր է իրավիճակի կայունացման, էսկալացիայի կանխարգելման համար։ Իրականացվում է թե՛ երկկողմ, թե՛ եռակողմ քաղաքական երկխոսություն երկու կողմերի միջև»,-հավելեց նա։
Անի Գևորգյան