Ինչպես հայտնի է, դեկտեմբերի 8-ից Հայաստանում բուքմեյքերական հաշիվներ համալրել հնարավոր է միայն բանկային քարտից: Այլ կերպ ասած, օրենքով արգելվեց վճարային տերմինալներից հաշիվը լիցքավորելու հնարավորությունը:

Այսպիսով պետությունը փորձելու է վերահսկել ոլորտը, դարձնել այն առավել թափանցիկ ու այս ճանապարհով պայքարել խաղամոլության դեմ: Թեև օնլայն խաղադրույքներ կատարողների զգալի մասը մինչ այս օրենսդրական փոփոխությունն էլ բանկային քարտով էր լիցքավորում հաշիվը, բայց, ինչ խոսք, շրջանառության զգալի մասը բաժին էր հասնում վճարային տերմինալներին՝ այդպես ոչ միայն արագ էր, այլ նաև անանուն: Իսկ եթե քաղաքացու հաշվեհամարների վրա կալանք կա դրված կամ նա վարկային վատ պատմություն ունի և ցանկացած գումար սառեցվում է, ապա նաև ապահով տարբերակ էր:

Եվ ահա, նոր փոփոխությունները խաղադրույքների սիրահարներին նոր խնդիրների առաջ կանգնացրեցին, որոնցից մեկի մասին քիչ վերև նշեցինք: Հենց նման դեպքերի համար է, որ պետությունը գնաց խաղադրույքները վերահսկելի դարձնելու ճանապարհով՝ որոշակիորեն ապահովագրելով առանց այդ էլ պարտքերի տակ կքած ընտանիքներին նոր ֆինանսական կորուստներից, ինչին տանում է ընտանիքի անդամներից մեկի խաղամոլությունը:

Այս փոփոխությունը նաև կարևոր հարցադրում առաջ բերեց. քաղաքացիների շրջանում մտահոգություն կա, որ քարտով խաղադրույք կատարելը, անկախ դրա հաճախականությունից՝ ամեն օր, ամեն ժամ, թե ժամանակ առ ժամանակ, բանկերը հետո օգտագործելու են իրենց դեմ: Այլ կերպ ասած՝ արդյոք սա հավելյալ գործիք չէ՞ քաղաքացիների դեմ նրանց, օրինակ, վարկ տրամադրելու հարցում մերժելու համար:

MediaHub-ը խնդիրը պարզաբանելու համար դիմեց հայաստանյան խոշոր երկու բանկերին, որպեսզի հասկանա՝ եթե քաղաքացին խաղադրույք է կատարում իրենց բանկի քարտերով, ապա հնարավո՞ր է դա իր դեմ օգտագործեն բանկում ու, ասենք, վարկ չտան կամ այլ գործարք կատարելու հարցում մերժեն:

Երկու բանկից էլ նույնանման պատասխանը ստացանք՝ մտահոգություններն անհիմն են, քանի որ կարևոր չէ քաղաքացու ծախսերը և դրանց նպատակները, կարևորը այլ բան է.

«Բանկին հետաքրքիր է այն, թե որքանով է ունակ քաղաքացին կատարել իր պարտավորությունները մեր առջև, այլ ոչ թե ծախսային նպատակները»,- փոխանցեցին մեզ:

Այսինքն, եթե քաղաքացին ժամանակին վճարում է իր պարտավորություններով, չունի ուշացումներ, ունի վարկային լավ պատմություն և խնդրահարույց հաճախորդ չէ, ապա, օրինակ, վարկ տալ իրեն չեն մերժի միայն այն պատճառով, որ նա ԻՐ ՍԵՓԱԿԱՆ գումարները ծախսում է, ասենք, բուքմեյքերական ընկերության հաշիվ լիցքավորելու համար: Այնպես որ, հավաստիացրեցին MediaHub-ին, նման մտահոգություններն անհիմն են:

Ի դեպ, իշխանությունը խոստանում է՝ խաղամոլության դեմ պայքարի շրջանակներում առաջիկայուն նոր օրենքներ են ընդունվելու...