Մեծ Բրիտանիայի վարչապետ Քեյր Սթարմերը երկրում սառեցված 25 միլիարդ ֆունտ ստեռլինգի ռուսական ակտիվների առգրավումը անվանել է «բարդ»։
«Այն քննարկվում է, բայց դա բարդ հարց է։ Կան բազմաթիվ մրցակցող գործոններ, որոնք պետք է ուշադիր կշռադատվեն այդ որոշումը կայացնելիս։ Մենք քննարկում ենք դա մեր դաշնակիցների հետ, բայց ես չեմ ուզում ձևացնել և Համայնքների պալատում ասել, որ այս հարցի հեշտ պատասխան կա, քանի որ այդպիսին չկա», - ասել է Սթարմերը բրիտանական խորհրդարանում, երբ նրան հարցրել են, թե արդյոք նա կքննարկի ռուսական ակտիվների առգրավումը և դրանց Ուկրաինա տեղափոխումը հունիսի 15-17-ը Կանադայում կայանալիք G7 հանդիպման ժամանակ։
Ռուսաստանի արտաքին գործերի նախարարությունը Եվրոպայում ռուսական ակտիվների սառեցումը որակել է «գողություն»՝ նշելով, որ ԵՄ-ն թիրախավորում է ոչ միայն մասնավոր միջոցները, այլև ռուսական պետական ակտիվները։ Ռուսաստանի արտաքին գործերի նախարար Սերգեյ Լավրովը հայտարարել է, որ Մոսկվան կարձագանքի Արևմուտքի կողմից ռուսական սառեցված ակտիվների առգրավմանը։
Ուկրաինայում ռուսական հատուկ գործողության մեկնարկից հետո ԵՄ-ն և G7-ի երկրները սառեցրել են Ռուսաստանի արժութային պահուստների գրեթե կեսը՝ մոտավորապես 300 միլիարդ եվրո։ Ավելի քան 200 միլիարդ եվրո ԵՄ-ում է, հիմնականում բելգիական Euroclear-ի հաշիվներում, որը աշխարհի ամենամեծ կլիրինգային և հաշվարկային համակարգերից մեկն է։