Արցախի գրողների միության նախագահ, Հայաստանի մշակույթի վաստակավոր գործիչ, Ստեփանակերտի «Գրիգոր Նարեկացի» համալսարանի հիմնադիր, բանասիրական գիտությունների դոկտոր, պրոֆեսոր, գրականագետ, բանաստեղծ Վարդան Հակոբյանին՝ Արցախն այսօր վերջին հրաժեշտը տվեց: Հաղորդում են Արցախի Հանրայինից։
Արարողությանը ներկա էր նաև նախագահ Արայիկ Հարությունյանը՝ Արցախի 2-րդ և 3-րդ նախագահների հետ: Վարդան Հակոբյանը Շարժման ակտիվիստներից, ոգեշնչողներից մեկն է եղել: Հետագայում էլ՝ պահպանեց իր ակտիվ դիրքորոշումը։ Նրա արարման ու պայքարի հիմնական ճակատը, սակայն, գրականության ոլորտն էր:
Վարդան Հակոբյանի հեղինակած բանաստեղծական շարքերի ու գեղարվեստական բազմաժանր գործերի առանցքում՝ հայրենիքն է՝ կորուստներով, ձեռքբերումներով, տագնապներով և ապագայի հանդեպ լուսավոր հավատով։ Վարդան Հակոբյանը մնալու է արցախահայության սրտում և հուշերում՝ իր թողած հսկայական գրական ժառանգությամբ, պայքարող ու ամուր արցախցի մտավորականի իր կերպարով,- համոզված են նրան հրաժեշտ տվողները: