Ունենք մեկ ու կես տարի վատնված ժամանակ։ Այդ մասին այսօր Արցախի հարցերով խորհրդարանական լսումների ժամանակ ասաց «Հայրենիք» կուսակցության մամուլի խոսնակ Սոս Հակոբյանը։
Նրա խոսքով՝ մենք ունենք պետություն, որը զուրկ է իր քաղաքացու անվտանգությունը պահպանելու կարողությունից։
«Մեր երկրի գոնե ձևական նախագահը խոսում է Ադրբեջանի սադրանքներից՝ ժպիտով ասելով՝ է հետո ինչ։ Մինչդեռ, միևնույն ժամանակ, թշնամի պետությունը հումանիտար աղետ է ստեղծում արցախցիների համար»,- ասաց նա՝ հավելելով, որ այդ հումանիտար աղետը լուծվեց ձեռքի հետ։
Ըստ Սոս Հակոբյանի՝ թշնամին ասում է, որ Արցախի ժողովրդի ինքնորոշման իրավունքը պետք է դուրս գա մեր օրակարգից, ու եթե սրան գումարվի այն, որ իշխանության ներկայացուցիչները Արցախի կարգավիճակի հարցը Ադրբեջանի կազմում քննարկելի են համարում, արդեն ցույց է տալիս՝ պահը օրհասական է։
«Մենք նորից պետք է ակտիվացնենք դեմ առ դեմ շփումը մեր հայրենակիցների հետ։ Պետք է մտնենք հասարակական երկխոսության մեջ։ Մենք բաժանելու ժողովուրդ չունենք»,- նկատեց նա։