Հայաստանի կառավարության անդամներից ամենասկանդալայինը՝ Նիկոլ Փաշինյանը, այս օրերին գտնվում է արձակուրդում։ Նրա արձակուրդը սկսվել է հուլիսի 28-ին և կտևի մինչև օգոստոսի 15-ը։
MediaHub-ը փորձեց նրա մամուլի խոսնակ Նազելի Բաղդասարյանից ճշտել, թե որտե՞ղ է անցկացնում Փաշինյանը արձակուրդը, սակայն պարզվեց՝ խոսնակը ևս արձակուրդում է։ Դիմեցինք կառավարության լրատվական ծառայությանը, որտեղից էլ մեզ ասացին, որ Նիկոլ Փաշինյանն արձակուրդն անցկացնում է Հայաստանում, ընդ որում՝ իրական Հայաստանում, այսինքն՝ Մասիս սարից այս կողմ։
Նկատենք, որ այս օրերին շատերը քննադատեցին, որ անվտանգային լուրջ սպառնալիքների տակ գտնվող Հայաստանի ղեկավարը քսան օրով արձակուրդ է գնում՝ երկիրը թողնելով, փաստացի, անտեր։ Թեպետ՝ գուցե բարին էլ դա է։
Մյուս կողմից, այսօր ՌԴ նախագահի մամուլի խոսնակ Դմիտրի Պեսկովը լրատվամիջոցներին հայտնել էր, որ նախագահ Պուտինը երբևէ պաշտոնապես արձակուրդ չի մեկնել, քանի որ պետության ղեկավարի գործառույթներն այնպիսին են, որ արձակուրդ մեկնելու հնարավորություն չեն ենթադրում։
Իսկ, ահա, Հայաստանի ղեկավարի դեպքում այդպես չէ՝ Նիկոլ Փաշինյանը, չնայած իր երիտասարդ տարիքին, շուտ է հոգնում, և, անկախ իր գործառույթներից և պետության առջև ծառացած խնդիրներից, պետք է պարբերաբար մեկնի երկարաժամկետ հանգստի։ Իսկ Պուտինն այդ տարիքին, փաստորեն, չի հոգնում ու չի էլ գնում հանգստի, թեպետ ժամանակ առ ժամանակ Շոյգուի հետ մեկնում է տայգաներ՝ որսի։
Վահե Մակարյան