Ես որևէ անգամ չեմ ասել, որ չեմ ուզում գալ։ Այդ մասին այսօր ԱԺ-ում լրագրողների հետ զրույցում ասաց Արցախի ԱԽ նախկին քարտուղար Սամվել Բաբայանը՝ անդրադառնալով 44-օրյա պատերազմի հանգամանքները քննող հանձնաժողովի նիստին, որը երեք ժամից ավելի տևեց։
Նրա խոսքով՝ ինքը որևէ հարցից չի խուսափում, դրա համար՝ հրավիրել են, եկել է։ «Ես անկեղծ, ամբողջովին ներկայացրել եմ իրավիճակը՝ և՛ 44-օրյայի ժամանակ, և՛ հիմա»,- նշեց նա։
Հարցին, թե իր կարծիքով՝ ո՞վ է այս ամենի հիմնական մեղավորը՝ Բաբայանը անվանական չպատասխանեց։
Դիտարկմանը, որ ինքը 2020-ի նոյեմբերի 10-ին հրաժարվել է Արցախի հերոսի կոչումից, քանի որ, իր խոսքով՝ Արցախի ու Հայաստանի իշխանությունների դավադիր որոշմամբ հանձնվեց Արցախի մեծ մասը, հիմա՞ էլ է շարունակում նույն կարծիքին մնալ, Արցախի ԱԽ նախկին քարտուղարն արձագանքեց, որ եթե մի անգամ մի բան ասում է, չի փոխում իր տեսակետը։
«Եթե «կամանդույուշիյ արմիին» չի ղեկավարում ռազմաճակատը, իր հետ մեկտեղ ղեկավարում են ևս այլ անձինք, պետք է քննություն գնա, ճշտվի։ Ես դրվագներով, փաստերով եմ ներկայացնում ամեն բան»,- նշեց նա։
Իսկ ո՞րն է անձամբ Նիկոլ Փաշինյանի մեղավորությունը, Սամվել Բաբայանը հստակեցրեց, որ ոչ ճիշտ կադրային քաղաքականությունը և հավատալը նրանց, ում պետք չէր։
«Դու խի՞ եք համարում, որ ոչ ճիշտ ռազմական ղեկավար նշանակելը դավաճանություն չի։ Եթե ես հասկանում եմ, որ էս մարդուն նշանակում եմ պաշտոնին, ինքը չի կարող էս խնդիրն անել։ Էդ դավաճանություն է, թե՞ ոչ»,- հարցրեց Բաբայանը։
Նաև վստահեցրեց, որ ինքը որևէ պաշտոնի չի հավակնում։
Մանրամասները՝ տեսանյութում։