Վերջին օրերին հեղուկ գազի գինը կտրուկ աճել է, վերջինիս արժեքը այս օրերին տատանվում է 180-190 դրամի սահմաններում, նախկին 120 դրամի փոխարեն։
MediaHub-ը բազմիցս է գրել այն մասին, որ արդեն մի քանի օր է, ինչ Վերին Լարսում տասնյակ բեռնատարներ չեն կարողանում հատել անցակետը, ինչի հետևանքով Հայաստանում նման իրավիճակ է ստեղծվել։
Այսօր էլ հայտարարվեց, որ Վերին Լարսի սահմանին Ռուսաստանն արտակարգ դրություն է հայտարարել։ Մաքսային անցակետի պաշտոնական կայքում նշված է, որ ճանապարհը փակ է եղանակային պայմանների պատճառով, այս պահին հերթում կա 2543 մեքենա։ Վրացական կողմի Կազբեգիի մաքսային անցակետերում այս պահին հերթում կա 442 բեռնատար։
Ստեղծված իրավիճակի մասին MediaHub-ը զրուցեց տնտեսագետ Սուրեն Պարսյանի հետ, ով էլ նշեց՝ Վերին Լարսի անցակետն ամռան ամիսներին ծանրաբեռնված է լինում, հաշվի առնելով այն հանգամանքը, որ գյուղմթերքի արտահանում է տեղի ունենում դեպի Ռուսաստան, դրան գումարած մեծ թվով մարդատար մեքենաներ են անցնում, առկա է տուրիստական տեղաշարժ, ինչը գերծանրաբեռնում է Վերին Լարսի անցակետը։
«Եվ եթե ճանապարհները երկար ժամանակով փակ մնան, ապա կրկին հեղուկ գազի գնի բարձրացում տեղի կունենա»,- նշեց տնտեսագետը։
Էմմա Մարտիրոսյան