Ընդամենը ՀԿ ղեկավարի կողմից է հրավեր եղել։ Այդ մասին այսօր ԱԺ-ում լրագրողների հետ զրույցում ասաց ԱԳ փոխնախարար Վահան Կոստանյանը՝ անդրադառնալով ՆԱՏՕ անդամ պետություններից մեկից ՀՀ-ին ուղղված հրավերին։
Նրա խոսքով՝ ՀՀ-ն ու ՆԱՏՕ-ն առաջին տարին չէ, որ գործընկերային հարաբերությունների մեջ են։
«Մենք տարբեր ձևաչափերով համագործակցում ենք ՆԱՏՕ-ի հետ, և ունենք պատրաստակամություն՝ շարունակելու այս գործընթացը»,- նշեց նա։
Դիտարկմանը, որ այս հայտարարությունը եղավ այն բանից հետո, երբ Նիկոլ Փաշինյանն իր հարցազրույցներից մեկում ասաց, թե տպավորություն է, որ ՌԴ-ն է ցանկանում դուրս գալ տարածաշրջանից, ԱԳ փոխնախարարն արձագանքեց՝ ինքը չի կարող ասել՝ փոխկապակվա՞ծ է, թե՞ ոչ։
«Ինչ վերաբերում է ՌԴ-ի հետ հարաբերություններին և այն խնդիրներին, որ տեսնում ենք այս հարաբերություններում, դրանց մասին բազմիցս բարձրաձայնվել է։ Մասնավորապես, երբ 2022-ի սեպտեմբերին հարձակում եղավ ՀՀ ինքնիշխան տարածքի վրա, մենք ավելի ադեկտվատ արձագանք էինք սպասում թե՛ ՌԴ-ից, թե՛ ՀԱՊԿ-ից»,- նշեց նա։
Հարցին, թե ռուս գործընկերների հետ հանդիպման ժամանակ այս հարցերը հնչո՞ւմ են, հայկական կողմն ուղիղ հարցնո՞ւմ է՝ ՌԴ-ն պատրաստվո՞ւմ է դուրս գալ տարածաշրջանից, Կոստանյանը պատասխանեց՝ ռուս գործընկերների հետ միշտ շատ անկեղծ խոսակցություն են ունենում և բարձրաձայնում են այն մտահոգությունները, որոնք առկա են։