Ազատության հրապարակում բողոքի ակցիա էր, որը կազմակերպել են արցախցի երիտասարդները։
Նրանք պահանջում են բացել Արցախը Հայաստանին կապող միակ ճանապարհը, որն արդեն մեկ օր է փակել են ադրբեջանցիները՝ իրենց գործողությունները ներկայացնելով իբրև բնապահպանական ակցիա։ Այս ամենը Արցախին կանգնեցրել է հումանիտար աղետի առջև։
«Ակցիայի նպատակն է մեր ձայնն ավելի հնչեղ ներկայացնել թե՛ ԱՄՆ դեսպանատանը, թե՛ Ֆրանսիայի դեսպանատան ներկայացուցիչներին, ովքեր կարող են մի փոքր ազդեցություն ունենալ թուրք-ադրբեջանական քաղաքական վերնախավի աշխատանքի ու իրենց վատ գործողությունների վրա»,- ասաց բողոքի մասնակիցներից Անի Առաքելյանը։
Վերջինս վստահ է, որ միջազգային հարթակում այս անգամ անպայման արձագանք լինելու է և լսելի է դառնալու իրենց ձայնը։
«Իշխանությունները միգուցե ձեռքերը լվացել են իրենց աշխատանքով և վերաբերմունքով Արցախի հարցի վերաբերյալ։ Մենք՝ երիտասարդներս, հայ ժողովրդի հետ կարող ենք ազդել այդ գործողությունների վրա և բացել միակ ճանապարհը, որը կապում է Հայաստանի հետ»,-ընդգծեց բողոքի ակցիայի մասնակիցը։
Անի Առաքելյանի խոսքով, այժմ չեն կարող գնալ աշխատանքի կամ տանը մնալ, քանզի 120 հազար հայ մարդ հիմա սպասում է իրենց օգնությանը։ «Ես ինքս Հադրութից եմ, իմ ընտանիքի և ընկերների հետ այստեղ եմ, հադրութեցի մարդիկ շատ եմ տեսել, Շուշիից էլ, չեմ կարող ասել ինչ պատճառներով ոմանք չեն կարողանում գալ»,-ասաց Անի Առաքելյանը։
Բողոքի ակցիայի մասնակիցները հավաքվել են Ազատության հրապարակում, որից հետո պատրաստվում են շարժվել դեպւ դեսպանատներ։
Մանրամասները՝ տեսանյութում։