Լոնդոնում բանկի կողոպտիչը ներկայացել է որպես անվտանգության աշխատակից եւ համոզել աշխատակիցներին իրեն փոխանցել 179 000 դոլար, գրում է LADBible-ը։ Ամեն ինչ այնքան հարթ է անցել, որ աշխատակիցները միանգամից չեն նկատել խաբեությունը։
ԶԼՄ-ների տեղեկություններով՝ տղամարդը համազգեստով մտել է բանկի մասնաճյուղ։ Մոտենալով դրամարկղին՝ նա աշխատակցուհուն ցույց է տվել անձը հաստատող կեղծ փաստաթուղթ եւ պահանջել իրեն տալ ողջ կանխիկ գումարը։ Թղթադրամներով տուփերը ստանալուն պես նա հեռացել է անհայտ ուղղությամբ։
Ավելի ուշ աշխատակիցները զանգահարել են ինկասացիոն ծառայություն՝ ճշտելու, թե ստացել են արդյոք գումարը, սակայն վերջիններս չեն հասկացել, թե ինչի մասին է խոսքը։
Հասկանալով, որ իրենց խաբել են, բանկի աշխատակիցները ոստիկանություն են կանչել։ Ճիշտ է, երբ սպաները ժամանել են, կողոպտիչն արդեն անհետացել է՝ ոչ մի հետք չթողնելով։ Ըստ ականատեսների՝ տղամարդը նստել է մոտակայքում կայանված ֆուրգոնը, որում նրան սպասելիս է եղել վարորդը։ Ոստիկանությունից հաստատել են դեպքի փաստը, սակայն հայտնել են, որ առայժմ տեղեկություն չունեն տղամարդու ինքնության մասին։