Պանամայի նախագահ Խոսե Ռաուլ Մուլինոն պատասխանել է ԱՄՆ նորընտիր նախագահ Դոնալդ Թրամփին։

Մուլինոն ընդգծել է, որ Պանամայի ջրանցքը պատկանում է իր երկրին, և այդ հարցը չի քննարկվում։

Ավելի վաղ, Թրամփը հրապարակել էր Պանամայի ջրանցքի լուսանկարը՝ ամերիկյան դրոշով: «Բարի գալուստ Միացյալ Նահանգների ջրանցք»,- TRUTH Social սոցցանցում հրապարակմանը կից գրել էր նա։ 

ԱՄՆ նորընտիր նախագահը դժգոհել էր, որ Պանամայի ջրանցքով ամերիկյան նավերի անցման մաքսատուրքերը չափազանց բարձր են, ու սպառնացել է վերադարձնել այն ԱՄՆ վերահսկողությանը։ «Պանամայի կողմից գանձվող վճարները ծիծաղելի են ու խիստ անարդարացի: Մեր երկրի այս լիակատար թալանն անմիջապես կկանգնեցվի»,- ասել է նորընտիր նախագահն Արիզոնայում կայացած պահպանողական համաժողովին։

Մինչ այս Թրամփը իր Truth Social սոցիալական ցանցում գրել էր նաև, որ Պանամայի ջրանցքը Միացյալ Նահանգների «կենսական ազգային արժեքն է», և որ երկրի նախկին նախագահ Ջիմի Քարթերը «այն տվել է մեկ դոլարով»։

ԱՄՆ-ը վերահսկել է ջրանցքը մինչև 1999 թվականի վերջը, երբ 1977 թվականի համաձայնագրով վերահսկողությունը փոխանցել էր Պանամայի իշխանություններին:

«Պանամայի ջրանցքի և նրա հարակից տարածքների յուրաքանչյուր քառակուսի մետրը պատկանում են Պանամային և կշարունակի պատկանել»,- աոձագանքել է Պանամայի նախագահ Խոսե Ռաուլ Մուլինոն: «Մեր երկրի ինքնիշխանությունը և անկախությունը չեն կարող քննարկվել»։

Նրա խոսքով՝ սակագները սահմանվում են՝ ելնելով շուկայական պայմաններից և ջրանցքի շահագործման և ենթակառուցվածքների պահպանման ծախսերից։