Մարդու իրավունքների պաշտպան Անահիտ Մանասյանի հանձնարարությամբ Պաշտպանի ներկայացուցիչներն այս պահին գտնվում են ՀՀ ՆԳՆ Ոստիկանության Երևան քաղաքի վարչության ձերբակալվածներին պահելու վայրում՝ Սամվել Վարդանյանին տեսակցելու նպատակով։ Այս մասին MediaHub-ի հարցին ի պատասխան, թե արդյո՞ք ՄԻՊ-ը տեղյակ է, որ երեկ ձերբակալված Սամվել Վարդանյանը հայտարարել է, որ իրեն ծեծի են ենթարկել, հայտնեց ՄԻՊ խոսնակ Արթուր Ասլանյանը:
Հիշեցնենք, ավելի վաղ այսօր փաստաբան Ռուբեն Մելիքյանը հայտնեց, որ ՔՊ-ական պատգամավոր Հակոբ Ասլանյանի հետ միջադեպի մասնակից Սամվել Վարդանյանը, որը երեկ ձերբակալվել է, տեղեկացրել էր, որ ձերբակալվածների պահման վայր տեղափոխվելիս` ճանապարհին, մի խումբ դիմակավոր անձանց կողմից դաժան ծեծի է ենթարկվել:
MediaHub-ի հետ զրույցում երիտասարդին այսօր այցելած ընդդիմադիր պատգամավոր Արման Ղազարյանը հայտնեց, որ իրենց այցից հետո Վարդանյանը պետք է անցներ դատաբժշկական փորձաքննություն:
Մարիաննա Արամյան