Ռուսական կողմն առաջարկել է Ղարաբաղի կարգավիճակի հետ կապված հարցը թողնել ապագային, սակայն դա Ադրբեջանի համար անընդունելի է: Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը 2022 թ. ամփոփող մամուլի ասուլիսի ժամանակ։
«Մենք առաջին իսկ օրվանից հայտարարել ենք, որ այդ առաջարկն անընդունելի է։ Մենք բանակցում ենք հիմնարար սկզբունքների շուրջ»,- նշել է Բայրամովը։
Նա անդրադարձել է նաև այսպես կոչված, «Զանգեզուրի միջանցքին»՝ ասելով, որ միջանցքի կառուցման խոչընդոտը «վնասում է հենց Հայաստանին»։
Ինչ վերաբերում է խաղաղապահների գործունեությանը՝ Ադրբեջանի ԱԳ նախարարը նշել է՝ «ռուսական խաղաղապահ զորակազմի ամենօրյա գործունեության մասին ոչ մի փաստաթուղթ չկա, նման փաստաթղթի շուրջ այժմ էլ աշխատանք չի տարվում»:
Մեկնաբանելով Հայաստանի եւ Ադրբեջանի միջեւ խաղաղության պայմանագրի կնքման հարցը՝ Բայրամովը միանգամայն բնական է համարել, որ երկու կողմերն էլ ներկայացնում են իրենց առաջարկները։
«Դրանք պետք է քննարկվեն։ Վերջերս Հայաստանը ներկայացրեց իր առաջարկները, սակայն հաջորդ օրը հրաժարվեց մասնակցել համատեղ հանդիպմանը։ Ոչ մի կողմ երբեք չի ակնկալում իր բոլոր առաջարկների անվերապահ ընդունում։ Ադրբեջանը մշտապես տեսնում է ինչ-որ ամպագոռգոռ հայտարարություններ Հայաստանից՝ զուտ լսարանի համար եւ ոչ մի իրական քայլ»,- ասել էնԱ։
Բայրամովը խոսել է նաև տարածաշրջանային «3+3» ձևաչափի մասնին, կարծիք հայտնել, որ այն օգտակար է: Նրա խոսքով՝ Ադրբեջանի արտաքին քաղաքականության հիմնական գերակայությունը հարևան երկրների հետ բարեկամական, փոխշահավետ համագործակցության զարգացումն է:
«Վերջին շրջանում ադրբեջանաիրանական հարաբերություններում որոշակի լարվածություն է նկատվում։ Ադրբեջանի դիրքորոշումն է, որ հարաբերությունները պետք է զարգանան փոխադարձ հարգանքի, միմյանց գործերին չմիջամտելու շրջանակներում»,- նշել է Բայրամովը: