Hraparak.am-ը գրում է․
Շաբաթ օրը մամուլում տեղեկատվություն տարածվեց, որ հոկտեմբերի 20-ին ողբերգական դեպք է տեղի ունեցել Վայոց Ձորի մարզում։ Ժամը 12։50-ի սահմաններում ոստիկանության Եղեգնաձորի բաժին ահազանգ է ստացվել, որ Վայոց Ձորի մարզի գյուղերից մեկի տան անասնագոմում տղամարդու դի կա կախված։
Ոստիկաններն ու քննիչները նշված տան անասնագոմում հայտնաբերել են նույն գյուղի բնակիչ 44-ամյա Զորայր Դ․-ի դին՝ խոտի հակի թելով կախված։
Ըստ տեղեկությունների՝ Զորայր Դ-ն ծառայում էր ՀՀ ՊՆ N զորամասում որպես պայմանագրային զինծառայող։ Դեպքի փաստով Վայոց Ձորի մարզային քննչական վարչությունում նախաձեռնվել է քրեական վարույթ։
Տեղի ունեցածի հետ կապված մեկնաբանություն խնդրեցինք ՀՀ պաշտպանության նախարարությունից։ Խոսնակ Արամ Թորոսյանը նշեց, որ նախ ցավակցում է ընտանիքի անդամներին, ապա տեղեկացրեց, որ Զորայրը օգոստոս ամսին զորացրվել է զինված ուժերից։ Թորոսյանից հետաքրքրվեցինք նաև, թե մահացածը մասնակցե՞լ էր 44-օրյա պատերազմին։
«Խաչիկի ուղղությամբ մարտական հերթապահությունում է ընդգրկված եղել»,- ասաց նա։
Հիշեցնենք, որ ավելի վաղ MediaHub.am-ը գրել էր, որ կախված հայտնավերված Զորայր Դ-ն ՊՆ զինծառայող չէ։
«Նա օգոստոս ամսին զորացրվել է զինված ուժերից: Ցավակցում եմ ընտանիքի անդամներին»,- մեզ հետ զրույցում ասել էր ՊՆ մամուլի քարտուղար Արամ Թորոսյանը։