ՆԱՏՕ-ի երկրները տրիլիոնավոր դոլարներ կներդնեն պաշտպանության մեջ՝ ԱՄՆ-ի և նրա դաշնակիցների միջև ծախսերը հավասարակշռելու համար, հայտարաել է դաշինքի գլխավոր քարտուղար Մարկ Ռուտտեն Հաագայում երկրների ղեկավարների հետ հանդիպմանը։

«Չափազանց երկար ժամանակ Միացյալ Նահանգները, որպես դաշնակից, կրել է պարտավորությունների բեռի անհամաչափ մասը, բայց այսօրվանից դա կփոխվի։ Նախագա՛հ Թրամփ, սիրելի՛ Դոնալդ, Դուք հնարավոր դարձրեցիք այս փոփոխությունը... Մենք տրիլիոնավոր դոլարներ կներդնենք մեր ընդհանուր պաշտպանության մեջ՝ մեզ դարձնելով ավելի ուժեղ և արդար, հավասարակշռելով ծախսերը Ամերիկայի և նրա դաշնակիցների միջև», - Հաագայի գագաթնաժողովում ասել է դաշինքի գլխավոր քարտուղարը։

ՆԱՏՕ-ի երկրները մեղմացրել են Ռուսաստանի հասցեին քննադատությունն այսօր գագաթնաժողովի արդյունքներով պատրաստված հայտարարության մեջ՝ Թրամփի պատճառով, այս մասին հայտնել է «The Telegraph»-ը՝ հղում անելով նախագծի փաստաթղթին։

Հայտարարության մեջ ՆԱՏՕ-ի երկրները «վերահաստատում են իրենց շարունակական ինքնիշխան հանձնառությունը՝ աջակցելու Ուկրաինային, որի անվտանգությունը նպաստում է մեր անվտանգությանը, և այդ նպատակով դաշնակիցների պաշտպանական ծախսերը հաշվարկելիս կներառեն Ուկրաինայի պաշտպանությանը և նրա պաշտպանական արդյունաբերությանը ուղղված ուղղակի ներդրումները»։

Նախորդ տարիների հայտարարություններում ընդգծվել է, որ Ռուսաստանը մեղավոր է ներխուժման համար, և որ «Ուկրաինայի ապագան ՆԱՏՕ-ում է»։ Ներկայիս նախագծային կոմյունիկեն այլևս չի ներառում այս հայտարարությունը։

Հայտարարությունը նաև ընդգծում է նրանց պատրաստակամությունը՝ երկու մասով ավելացնելու պաշտպանական ծախսերը մինչև 5%՝ 3.5% հիմնական պաշտպանության և 1.5% պաշտպանական ենթակառուցվածքների համար։

«1.5%-ը Թրամփին հանգստացնելու քաղաքական ծրագրի մի մասն է։ Ենթադրվում է, որ այն արդեն իսկ իրականացվել է ՆԱՏՕ-ի 32 անդամներից յուրաքանչյուրի կողմից և հիմնականում ներառում է ենթակառուցվածքային նախագծերի վրա ծախսեր, որոնք կարող են օգնել դաշինքին պատերազմի ժամանակ», - գրել է «Telegraph»-ը։