Երբ հուլիսին ծնվեց Արլետա Ռամիրեսի դուստրը, հարց չկար, թե ինչպիսին է լինելու աղջկա սննդակարգը: Կրծքի կաթը հաստատված է Առողջապահության համաշխարհային կազմակերպության և Ամերիկյան մանկաբուժության ակադեմիայի կողմից, որոնք վկայակոչում են «միանշանակ ապացույցներ», որ այն պաշտպանում է նորածիններին հիվանդություններից: Ռամիրեսը նաև կրծքով կերակրող վետերան էր. նա որդուն կրծքով կերակրել էր երկու տարի:
Սակայն ԱՄՆ Վիրջինիա նահանգում բնակվող կնոջը, դատարանի որոշմամբ, հրամայվել է դադարեցնել կրծքով կերակրել իր վեց ամսական դստերն այն բանից հետո, երբ դատավորը խնամակալության հետ կապված լարված պայքարում որոշել է, որ դա նրա նախկին ամուսնուն խանգարում է տեսակցել երեխաներին և շփվել նրանց հետ:
Ռամիրեսն ու և իր դստեր հայրը բաժանվել են ծննդաբերությունից անմիջապես հետո, և հայրը տեղափոխվել է Հյուսիսային Վիրջինիա:
Ըստ աղբյուրի՝ նոյեմբերի վերջին դատարանը Ռամիրեսին կարգադրել է «գործադրել բոլոր ջանքերը՝ երեխայի կերակրման ժամանակացույց սահմանելու և շշով կերակրմանն անցնելու համար»:
Պատճառն այն է, որ նրանց հայրը՝ Մայք Ռիդգուեյը դժգոհել է, որ դստեր կերակրման ժամերը խանգարում են իր այցելություններին, մինչդեռ նրա նախկին կինը չի ցանկանում անցնել շշով կերակրմանը քանի որ կարծում է, որ «կրծքով տարբերակը լավագույնն է»:
Տարա Շտայններդը՝ Ռիդգուեյի փաստաբանը, ասում է, որ Ռամիրեսն օգտագործում է կրծքով կերակրումը՝ փորձելով փրկել ավարտված հարաբերությունները: